«Tomırıs» qazaq mádenı ortalyǵyna 8 jyldyǵyn atap ótti

22.09.2020 1178

2012 jyly Ońtústik Koreıada óz Otanyna degen maqtanysh pen súıispenshilik sezimi jetelegen bir top eriktilerdiń bastamasymen «Tomırıs» qazaq mádenı ortalyǵy ashylǵan bolatyn. Búginde onyń Ońtústik koreıadaǵy qazaq dıasporasynyń basyn biriktirip, jumys jasaǵanyna 8 jyl toldy. 

Onyń jetekshisi – otandasymyz Nazgúl Karabaeva. Alys shetelde jumys istep jatqan Ortalyqtyń negizgi maqsaty – qazaq mádenıeti men tilin, ulttyq brendterin, salt-dástúri men ádet-ǵurpyn jergilikti halyq arasynda keńinen nasıhattaý, Koreıanyń jáne basqa elderdiń halyqaralyq qaýymdastyǵynyń barlyq is-sharalaryna belsendi qatysý, qazaq jáne koreı halyqtary, sondaı-aq Ońtústik Koreıada turatyn basqa da dıasporalar arasyndaǵy dostyqty nyǵaıtý, Koreıanyń basqa qalalarynda (Pýsan, Ansan, Tejon jáne basqalary) qazaq mádenıetin tanystyra alatyn iskerlik úıler men mádenı ortalyqtar jelisin qurý. Osyǵan qosa josparda qazaqstandyq jobalardy tanymal etýge, bıznes kelisim-sharttar jasaýǵa, seriktester izdestirýge jáne týrıster tartýǵa kómektesýdi jolǵa qoıý bar. Sondaı-aq, halyqaralyq uıymdarmen qarym-qatynasty nyǵaıtý maqsatynda ortalyq halyqaralyq festıvaldarda, kontsertterde jáne Ońtústik Koreıada ótetin Naýryz meıramynda óner kórsetip keledi. Ortalyq túrli konkýrstarǵa belsendi qatysady, kórmeler uıymdastyrady, sonymen qatar Koreıadaǵy bilim alyp jatqan stýdenttermen tyǵyz baılanysta jumys isteıdi. 2012 jyldan bastap Koreıadaǵy «HangýkTamýnaEsýlde» áıelder qoǵamymen birlesip halyqaralyq festıvaldar ótkizip keledi. 2015 jyldan beri Koreıanyń oqý oryndarynda qazaq halqynyń mádenıeti, tarıhy men dástúri barynsha tanystyrylýda. Ortalyq 2016 jyly Koreıadaǵy dástúrli taǵam festıvalinde «Enıan San» syılyǵyn jeńip aldy. Sondaı-aq, 2017 jyly Koreıa depýtattary úıinde ótken halyqaralyq festıvalde «Chanre San» syılyǵyn ıelendi. 2018 jyly Koreıadaǵy QR Elshiliginiń atynan Itevon ákimdigimen birge halyqaralyq festıval ótkizdi. Osylaısha «Tomırıs» qazaq mádenı ortalyǵy tarıhı otanynyń mádenıetin kópshilikke tanystyrý maqsatynda halyqaralyq festıvalderdi ótkizýge meılinshe atsalysýda.

Telegram jańalyqtar

Jańalyqtar