Shyǵystyń sónbes juldyzdary

08.02.2021 1306


Shyǵystyń álemge áıgili ǵulamalary men oıshyldary Hafız, Fırdaýsı, Rýdakı, Nızamı, Omar Haııam, Saǵdı, Jalaladdın Rýmı, Nasır Hýsraý, Jámılerdiń arasynda Álisher Naýaı men Zahırıddın Muhammed Babyrdyń alar orny erekshe. Bıyl Túrki álemine ortaq tulǵa, ózbek ádebıetiniń negizin qalaǵan Álisher Naýaıdyń týǵanyna 580 jyl, al Zahırıddın Muhammed Babyrdyń týǵanyna 538 jyl tolyp otyr. Olardyń jazǵan shyǵarmalary men ónegeli ári ǵıbratqa toly ómiri men eńbek joly ǵasyrlar boıy adamzatqa rýhanı azyq bolýda. Uly aqyndardyń shyǵarmalary jáne ómir jolymen barlyǵymyz tanyspyz, olardyń týyndylaryn oqymaǵan jan joq shyǵar. Sol úshin biz olar týraly derekterdi jazýdy emes, búgingi tańda aqyndardyń týyndylaryn jastar arasynda nasıhattaý, osy dúnıeler arqyly olardyń boıyna adamılyq qundylyqtar men qasıetterdi sińirý maqsatynda elimizde atqarylyp jatqan is-sharalarǵa toqtalýdy jón sanadyq.


Shynynda da, jastardyń boıyna jaqsy qasıetterdi darytýda olardyń shyǵarmalary men rýbaılary taptyrmaıtyn tárbıe quraly. Sondyqtan Ózbekstanda jastardy mundaı rýhanı-aǵartý jıyndaryna kóp jumyldyrýǵa erekshe nazar aýdarady. Osy maqsatta uıymdastyrylǵan sharalardyń biri Tashkent oblysy Shyrshyq memlekettik pedagogıkalyq ınstıtýtynda «Shyǵystyń sónbes juldyzdary — Naýaı men Babyrdyń túrki tildes halyqtar ádebıetindegi orny» taqyrybynda ótti. Rýhanııatqa arnalǵan sharaǵa atalmysh joǵary oqý ornynyń rektory, Ózbekstan ǵylym qaıratkeri, professor Ǵofýrjon Mýhamedov, Ózbekstan Qazaq ulttyq mádenı ortalyǵynyń tóraǵasy Serik Úsenov pen ortalyqtyń belsendileri, jazýshy, professor Qaldybek Seıdanov jáne oqytýshylar men stýdentter qatysty. Joǵary deńgeıde ótken is-sharany oqý ordasynyń bilikti oqytýshylary Óserbaı Baıqabylov, Erkin Aıdarov jáne Jandos Baızaqovtar uıymdastyrdy.

Sharada sóz sóılegen Ǵafýrjon Mýhamedov pen Serik Úsenov uly aqyndardyń shyǵarmashylyǵymen qatar ultaralyq dostyq, ıaǵnı qazaq pen ózbek halyqtarynyń arasyndaǵy ádebı baılanystardy da tilge tıek etti. Al kópke belgili jazýshy Qaldybek Seıdanov Shyǵystyń qos juldyzy Álisher Naýaı men Babyr týraly baıandama jasady. Onyń baıandamada keltirgen qundy faktileri men tarıhı mańyzy bar oqıǵalary stýdentterdiń de, basqa  qatysýshylardyń da kóńiline qonymdy boldy. Sharaǵa qatysýshylardyń barlyǵy aǵartý salasynyń maıtalmany Q.Seıdanovqa alǵystaryn aıtyp jatty.

Álisher Naýaı men Babyrdyń týǵan kúni qarsańynda ótken sharada joǵary oqý ornynyń stýdentteri olardyń kez kelgen ýaqytta jáne qoǵamda mańyzyn joımaǵan, kemeldený jolynda qoldanylatyn rýbaılary men óleńderin jatqa oqyp, jınalǵan jurtshylyqty rıza etti. Sonymen qatar birinshi kýrstyń bir top jigitteri «Sultan jáne onyń qyryq ýáziri» atty astarly áńgime negizinde sahnalaǵan kórinisteri arqyly Naýaıdyń asyl qasıetterin, fılosofııalyq kózqarasyn, kishipeıildiligin jáne úlgi alarlyqtaı ustanymdaryn sheberlikpen kórermenge jetkizse, mýzyka baǵytynda bilim alatyn ekinshi kýrs stýdenti Janǵalı Adılov «Kózimniń qarasy» ánin aıtyp, Naýaı men Abaıdyń shyǵarmashylyǵyn úılestirdi.

Shyrshyq qalasyndaǵy №17 jalpy orta bilim beretin mekteptiń oqýshylary «Týǵan jer» ánin aıtyp, bı bıledi. Al Bostandyq aýdany «Aıdaraly» aýylyndaǵy №31 mekteptiń «Balaýsa» áýesqoı dombyrashy balalar ansambli «Sarjaılaý» ánin tamyljyta shyrqap, jınalǵandardy bir serpiltip tastady.

Shyǵystyń uly ǵulamalary Naýaı jáne Babyrdyń óleńderi ózindik erekshelikterge ıe. Biriniń óleńin oqyp rýhanı turǵydan kemeldenseń, taǵy biriniń lırıkalyq óleńderi týǵan jer men tabıǵatty súıýge baýlıdy. Sharada Naýaıdyń óleńderine Abaı tánti bolǵany, onyń shyǵarmashylyǵyn qazaq jazýshylary Muhtar Áýezov, Esmaǵambet Ysmaıylov, Rahmanqul Berdibaevtardyń zerttegeni týraly, sondaı-aq belgili aqyn Nesipbek Aıtovtyń rýbaılardy qazaq tiline tárjimálaǵanyn da tilge tıek etip, olardyń bul eńbekterin qatysýshylar ádebı dostyqqa balady.
Aqparat úshin, 2020-2021 oqý jylynda úsh baǵytta 150-ge jýyq stýdent oqýǵa túsip, ana tilimizde bilim alýda. Bul elimizde ózge ult ókilderiniń tilin, mádenıetin, salt-dástúri men ádet-ǵuryptaryn saqtaý, bolashaq urpaqqa jetkizý maqsatynda jasalǵan qamqorlyqtyń aıqyn kórinisi.

Aıgúl ERKІNQYZY, Respýblıkalyq «Nurly jol» gazetiniń tilshisi. Ózbekstan Respýblıkasy, Tashkent qalasy   

Telegram jańalyqtar

Jańalyqtar