Qandastar Prezıdent Joldaýyn talqylady

22.09.2020 1186

«Otandastar qory» men «Dúnıejúzi qazaqtarynyń qaýymdastyǵy» birlese otyryp, QR Prezıdenti Qasym-Jomart Toqaevtyń Qazaqstan halqyna Joldaýyn talqylaýǵa arnalǵan dóńgelek ústel ótkizdi.   

Іs-sharaǵa «Otandastar qorynyń» vıtse-prezıdenti Maǵaýııa Sarbasov, Ulttyq keńes múshesi, qoǵam qaıratkeri Aýyt Muqıbek, tanymal etnodızaıner Qazıpa Muhametqalı, «Asar» respýblıkalyq QB tóraǵasy Qaırat Bodaýhan, kásipkerler Bilal Ysqaq, Aınur Jakeıqyzy, sondaı-aq «Dúnıejúzi qazaqtarynyń qaýymdastyǵynyń» ókilderi men elimizge ártúrli ýaqytta kóship kelgen qandastar qatysyp, óz pikirlerin ortaǵa saldy. – Joldaýda kóptegen másele qozǵaldy. Onyń ishinde áleýmettik salany erekshe atap ótýge bolady. Máselen muǵalimderdiń, dárigerlerdiń jalaqysy kóteriledi, sondaı-aq halyq zeınetaqysynyń bir bóligin úı satyp alýǵa jumsaı alatyn boldy. Kásipkerlikti qoldaýǵa kóptegen sharalar qarastyrylyp, salyq jeńildikteri aıtyldy. Osyndaı múmkindikter bizdiń qandastarǵa da oń áserin tıgizedi degen senimdemiz, - dedi «Otandastar qorynyń» vıtse-prezıdenti Maǵaýııa Sarbasov.  


«Asar» respýblıkalyq QB tóraǵasy Qaırat Bodaýhan Joldaýda aýyl máselesi óte jaqsy kóterilgenin tilge tıek etti.  – Men Soltústik Qazaqstan oblystaryn araladym. Prezıdentimiz qozǵaǵan basty másele – jer men úı salý. Osy salany zerttep júrgen azamattar men «Otandastar qory» bar, halqy kóship ketken aýyldarǵa arnap arnaıy baǵdarlama daıyndaý kerek dep oılaımyn. Shetten kelgen qandastardyń sharýashylyqqa ıkemi bar. Qandastarymyz Prezıdent Joldaýyndaǵy aýyl sharýshylyǵyn qoldaý bastamasyn qoldaıdy. Soltústik Qazaqstan oblysynda kúzgi jáne kóktemgi egin sharýashylyǵy kezeńinde maman tapshylyǵy baıqalady. Osy tapshylyqty atajurtqa oralǵan qandas baýyrlarymyz tolyqtyrsa degen oıdamyn, - dedi  Qaırat Bodaýhan.  


Al Eýrazııa dızaınerler odaǵynyń múshesi, kásipker, etno-dızaıner Qazıpa Muhametqalı kásipkerlikti damytyp, onyń ishinde qolóner salasyna kóńil bólinip jatqanyna toqtaldy.   – El prezıdenti Qazaqstanda kásipkerlerdiń sanyn arttyrý maqsatynda kóptegen sharalar qolǵa alynatynyn aıtty. Óz tarapymnan, qoldan kelgenshe, qolóner salasyndaǵy jobalardy iske asyryp, bar bilgenimdi basqalarǵa da úıretýge atsalysyp jatyrmyn. Qazirgi zaman talaby boıynsha barlyq sabaqtardy onlaın formatta ótkizip te jatyrmyz. Erteń bir adam osy kásipti úırenip, óz isin dóńgeletip ketse, nur ústine nur bolar edi. Osyndaı kásipkerlerge jan-jaqty qoldaý kórsetiletini kóńilge úmit uıalatyp otyr, - dedi Qazıpa Muhametqalı. Sondaı-aq, dóńgelek ústel barysynda Memleket basshysynyń Qazaqstan halqyna Joldaýyn nasıhattaý jáne júzege asyrýdaǵy «Otandastar qorynyń» mindetteri ortaǵa salynyp, eldegi qandastar men sheteldegi qazaq dıasporalarynyń ózekti máseleleri talqylandy.

Telegram jańalyqtar

Jańalyqtar