«Abaı ınstıtýty» portaly tanystyryldy

19.11.2020 1011

18 qarasha Mádenıet jáne sport mınıstrligi Til saıasaty komıtetiniń tapsyrmasymen Shaısultan Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy «Abaı ınstıtýty» el ishi men shetelde qazaq tilin úıretý jáne ilgeriletý baǵdarlamasy aıasynda ázirlengen portaldyń tanystyrylymyn onlaın ótkizdi.​


«Memleket basshysy uly Abaıdyń 175 jyldyǵyn joǵary deńgeıde merekeleý týraly arnaıy Jarlyǵy halqymyzdyń tarıhı jady men rýhanı ómirine sony serpilis ákelgen tarıhı oqıǵa boldy. Qazaqstan Respýblıkasy Mádenıet jáne sport mınıstrligi tarapynan osy baǵytta qolǵa alǵan sharýanyń shoqtyǵy bıigi – osy «Abaı ınstıtýty» ashyq bilim berý jobasy. Bul sharanyń qaınar kózi «Qazaqstan Respýblıkasyndaǵy til saıasatyn iske asyrýdyń 2020-2025 jyldarǵa arnalǵan memlekettik baǵdarlamasynan» bastaý alady. Qazirgi tańda «Otandastar qorymen» birlesip, bes memlekette: Túrkııa, Iran, Reseı, Belgııa jáne AQSh elderinde qazaq tilin oqytý kýrstaryn bastadyq», - deıdi quttyqtaý sóz sóılegen Til saıasaty komıtetiniń tóraǵasy Ádilbek Qaba.


Syrtqy ister mınıstrligi shetelderdegi qazaq dısporalarymen jumys júrgizý jónindegi basqarma basshysy Muhtar Káribaı ana tilimizdi shetelde oqytý mańyzdylyǵyna toqtaldy. «Otandastar qorynyń» jobalar koordınatory Dıdar Bolat portaldyń jemisti júzege asýyna sáttilik tiledi.

Sh. Shaıahmetov atyndaǵy «Til-Qazyna» ulttyq ǵylymı-praktıkalyq ortalyǵy dırektorynyń orynbasary Aıdos Ábdihalyq portal týraly jan-jaqty málimet berdi. Jazýshy, fılologııa ǵylymdarynyń doktory, abaıtanýshy Tursyn Jurtbaı iske qosylyp jatqan jobadan zor úmit kútetinin atap ótti. Iran Islam Respýblıkasyndaǵy qazaq tili oqytýshysy Asqar Qazaq «Qazaq tilin oqytýda ınternet resýrstaryn paıdalaný týraly» aıtty.

Onlaın sharaǵa shetelderdegi Qazaqstan Respýblıkasy Elshilikteriniń jaýapty mamandary, Túrkııa, Iran, Reseı, Belgııa jáne AQSh elderinde qazaq tilin oqytyp jatqan kýratorlar men Brazılııa, Frantsııa, Germanııa, Qytaı, Ózbekstan, Mońǵolııada turyp jatqan baýyrlarymyz qatysty.

Telegram jańalyqtar

Jańalyqtar