«Qazaq radıosynda» jańa «Qandastar» habary ashyldy

09.02.2021 1065


Qara shańyraq «Qazaq radıosynda» ​ jańa «Qandastar» habary ashyldy. Habar aıasynda eldegi jáne álemdegi qandastarǵa arnalǵan jobalar tanystyrylyp, kóshi-qon, qujattardy rásimdeý, kvota berýge qatysty túıtkildi máselelerdi sheshý joldary talqylanady. Sondaı-aq atamekenge kóship kelgen soń, óz isiniń bilikti mamany retinde el qurmetine bólengen qandastarmen, sheteldegi álemge áıgili kompanııalarda qyzmet atqaryp júrgen otandastarymyzben suhbattar uıymdastyrylady.

2021 jylǵy 9 aqpanda «Qandastar» radıohabarynyń alǵashqy sany efırge shyqty. Oǵan elimizdegi jáne sheteldegi qandastarymyzdy qoldaý baǵytynda jumys júrgizip jatqan Dúnıejúzi qazaqtary qaýymdastyǵynyń keńesshisi Qarlyǵash Qojamurat pen «Otandastar qory» KeAQ vıtse-prezıdenti Maǵaýııa Sarbasov qatysty.

Sońǵy kezderi indetke baılanysty engizilgen karantınge oraı Qytaıdan kelgen qandastardyń elge kirý máselesinde birqatar túıtkilder týyndaǵan edi. Osyǵan oraı eki mekemeniń usynysymen vedomstvoaralyq úkimettik komıssııaǵa hat joldanyp, túıtkil oń sheshimin tapty. Ótken aptada jańa ereje engizilip, vızasy bar, shaqyrtýy bar qandastardyń elge kirýine shekteý qoıylmaıtyn boldy. ​

Sonymen qatar, baǵdarlama aıasynda taǵy bir súıinshi jańalyq aıtyldy. Atap aıtqanda qazir qazaqtar kóp shoǵyrlanǵan álemdegi 12 eldegi 24 iri qalada qazaq tilin úıretetin 31 synyp iske qosyldy. Olar sheteldegi qandastarymyzdyń ótinishterine oraı balalarǵa, jastarǵa ana tilin onlaın platformada arnaıy ádisteme boıynsha úıretip jatyr.

Osyǵan qosa jańa oqý jylynda Qazaqstandaǵy joǵary oqý oryndaryna álemdegi elderden 909 jas qandasymyz oqýǵa tússe, 825 jas daıyndyq kýrsyna, al 520 jas qandas kolledjderge qabyldanǵan. Olardyń barlyǵy jazda UBT synaǵan tuńǵysh ret onlaın tapsyrǵan edi.

2020 jyly Stambýl, Berlın, Táshkent, Omby, Kıev qalalarynda qandastarymyzdy qoldaýǵa baǵyttalǵan «Abaı» mádenı-iskerlik úıleri ashyldy. Bıyl Baıan-Ólgeı aımaǵynda, Bishkek pen Astrahan qalalarynda ashý josparlanyp otyr.

«Qandastar» habary ár seısenbi saıyn «Qazaq radıosynan» saǵat 11:15-te tikeleı efırge shyǵatyn bolady. Aıta keteıik, kez-kelgen tyńdarman 8-717-2-75-72-75 telefony arqyly suraq qoıa alady. Habardyń júrgizýshisi – jýrnalıst Erkin Baıǵabyluly. «Qazaq radıosyn» onlaın tyńdaý: https://qazradio.fm/kz/.

Telegram jańalyqtar

Jańalyqtar