Óńirlik kvotaǵa engizilgen qandastarǵa qandaı jeńildikter usynylady?

Qazirgi kezeńde QR Úkimetiniń 2016 jylǵy 18 aqpandaǵy №83 qaýlysyna sáıkes qandastardy qonystandyrý úshin: Aqmola, Atyraý, Shyǵys Qazaqstan, Batys Qazaqstan, Qostanaı, Pavlodar, Soltústik Qazaqstan oblystary belgilengen. Atalǵan oblystar, QR Kóshi-qon zańnamasyna sáıkes, óńirge kóship kelgen qandastarǵa kvota qarastyrý úshin Eńbek jáne halyqty áleýmettik qorǵaý mınıstrligine usynys joldaýy tıis. Mınıstrlik jergilikti atqarýshy organdardyń bergen usynysyna sáıkes, tıisinshe qandastardy qabyldaýdyń óńirlik kvotasyn bóledi. Degenmen, osy ýaqytqa deıin Atyraý jáne Batys Qazaqstan oblystary qandastarǵa óńirlik kvota bólýge usynys bildirmegen, jergilikti bılik ony qandastardyń óńirde az qonystanýymen baılanystyrady.

Eske sala keteıik, 2021 jyly óńirlik kvota: Pavlodar oblysy boıynsha – 500, Qostanaı oblysy boıynsha – 350, Aqmola oblysy boıynsha – 258, Shyǵys Qazaqstan oblysy boıynsha – 195, Soltústik qazaqstan oblysy boıynsha – 123 adamǵa bólingen bolatyn. Osyǵan sáıkes, atalǵan oblystarǵa kelip qonystanǵan qandastar memleket tarapynan birshama materıaldyq qoldaýǵa ıe bolady.

Óńirlik kvotaǵa engizilgen qandastarǵa «Eńbek» memlekettik baǵdarlamasy aıasynda kóship kelgen otbasynyń árbir múshesine 35 AEK (102 095 tg) mólsherinde birjolǵy áleýmettik tólem, sondaı-aq turǵyn úıdi jalǵa alý jáne kommýnaldyq qyzmetterge arnalǵan shyǵystardy jabý úshin ornalasqan jerine (qala, aýyl), otbasy músheleriniń sanyna qaraı 12 aı ishinde aı saıyn 15-30 AEK mólsherinde ótemaqy tólenedi. Máselen, 4 adamnan turatyn ortasha otbasy bir ýaqytta 140 AEK alýǵa quqyly, bul 408 380 teńgeni quraıdy. Al otbasy músheleriniń sany ekeýden tórteýge deıin bolsa jáne aýylda qonystansa 18 AEK kóleminde, ıaǵnı 52 506 teńgeni úı jaldaýǵa jáne kommýnaldyq qyzmetterdi jabýǵa arnalǵan tólemdi 12 aı boıy ala alady.

Sonymen qatar, qyzmettik turǵyn úı nemese eńbekshi jastar úshin Eńbek baǵdarlamasy sheńberinde salynǵan (satyp alynǵan) jataqhanalardan bólmeler, sondaı-aq turǵyn úı satyp alý (qunyn tólep alý) jáne/nemese salý arqyly qonys aýdarýshylardy turǵyn úımen qamtamasyz etý úshin jaldamaly turǵyn úı berýdi, qonys aýdarýǵa járdem kórsetetin jumys berýshilerge sýbsıdııalar berýdi, qajet bolǵan kezde tehnıkalyq, kásiptik bilim alý úshin oqytýǵa, qysqa merzimdi kásiptik oqytýǵa jiberýdi, jumysqa ornalasýǵa jáne kásipkerlikti damytýǵa járdemdesýdi qamtıdy.

Qonysbek Jandos

Qandastardy qoldaý departamentiniń konsýltanty

Telegram jańalyqtar