«Қайрат – Реал Мадрид» матчына билетті қалай тез сатып алуға болады?
Ақмарал Ағзамқызы El.kz тілшісі
«Қайрат – Реал Мадрид» матчы – Қазақстан футболының тарихындағы ең үлкен оқиғалардың бірі. Мұндай мүмкіндікті ешбір жанкүйер жіберіп алғысы келмейтіні анық. Алайда, билеттердің санаулы минуттар ішінде сатылып кетуі әбден мүмкін. Сондықтан сіз көптен күткен ойынды жіберіп алмау үшін жылдам әрі сенімді билет сатып алуға көмектесетін 10 кеңесті ұсынамыз.
1. Билетті тек ресми сайттардан алыңыз
«Қайрат – Реал Мадрид» ойынына билеттер тек Ticketon.kz платформасында және «Қайрат» клубының ресми сайтында сатылады. Кей жағдайларда SeatPick, Hellotickets сияқты халықаралық сенімді сайттар қосылуы мүмкін. Ал белгісіз немесе күмәнді ресурстардан сатып алған жағдайда жалған билетке тап болып, ойынға кіре алмай қалуыңыз ғажап емес.
2. Алдын ала тіркеліп, жеке аккаунт ашыңыз
Билеттер сатылымға шыққанда әр секунд қымбат. Сол сәтте жеке мәліметтерді толтырып уақыт жоғалтпау үшін, алдын ала сайтқа тіркеліп, аккаунтыңызды дайындап қойғаныңыз жөн. Банктік картаңызды да қосып қойсаңыз, билет сатып алу тек бір батырманы басумен жүзеге асады.
3. Сатылым басталатын сәтті мүлт жібермеңіз
Билеттер белгілі бір күні, нақты белгіленген уақытта сатылымға шығады. Сол мезетте сайтқа дер кезінде кіріп, парақты жиі жаңартып отырған жөн. Бар-жоғы бірнеше минут кешіксеңіз де, билетсіз қалуыңыз әбден мүмкін.
4. Орын мен бағаны алдын ала таңдап алыңыз
Стадиондағы секторлар мен баға санаттарын алдын ала қарап шығыңыз. Өз бюджетіңізге сай және ыңғайлы орынды алдын ала белгілеп қойсаңыз, сатып алу кезінде уақыт жоғалтпай, тез шешім қабылдайсыз.
5. Электронды билетті таңдаңыз
Қағаз нұсқасымен әуре болғаннан гөрі электронды билет әлдеқайда ыңғайлы. Телефоныңыздағы QR-кодты көрсету жеткілікті. Бұл — уақыт үнемдейді әрі қауіпсіздік жағынан сенімді.
6. Бірнеше құрылғыны қатар қолданыңыз
Сатылым басталған сәтте сайтқа жүктеме көп түседі. Сол себепті телефоннан, ноутбуктан немесе планшеттен бір мезгілде кіріп отырғаныңыз тиімді. Қай құрылғы жылдам өткізіп жіберсе, билетіңізді сол арқылы ала бересіз.
7. Халықаралық платформаларды да қадағалаңыз
SeatPick билеттерді әртүрлі сатушылардан жинап ұсынады, ал Hellotickets шетелдік жанкүйерлерге ыңғайлы қызмет көрсетеді. Кей жағдайларда ресми сайттағы билеттер таусылып қалса, осы платформалардан іздеп көруге болады.
8. Әлеуметтік желідегі парақшаларды бақылаңыз
«Қайрат» клубының ресми Instagram, Telegram, Facebook парақшалары билеттердің сатылым уақыты мен қосымша билет сатылымы жайлы жедел ақпарат таратады. Кейде соңғы сәтте қосымша билеттер де шығуы мүмкін, сондықтан әлеуметтік желідегі жаңалықтарды жіті бақылап отырғаныңыз пайдалы.
9. Сақтық шараларын естен шығармаңыз
Ticketon бірнеше рет жалған сайттарға алданып қалмау керектігін ескерткен. Сондықтан билет аларда сайттың доменін міндетті түрде тексеріңіз: ол тек «ticketon.kz» немесе клубтың ресми парақшасы болуы тиіс.
10. Артық шығынға жол бермеңіз
Жалған делдалдардан немесе қайта сатушылардан билет алмауға тырысыңыз. Бағасы қымбат әрі жалған болуы ықтимал. Сенімді жол – тек ресми сатылым.
P/S: «Қайрат – Реал Мадрид» ойыны – бұл қарапайым матч емес, Қазақстан футболының жаңа белесін айқындайтын тарихи сәт. Жанкүйерлер үшін билет алу нағыз бәсекеге айналуы мүмкін. Сондықтан уақытты ұтымды пайдаланып, тек ресми дереккөздерге сеніп, алдын ала дайындалған жан ғана қалаған орнын иеленеді. Ең бастысы, сабыр сақтаңыз. Сайттағы кезек, баяу жүктелу – қалыпты жағдай. Дүрбелеңге салынбай, қайта-қайта жаңартып отырсаңыз, билет алу мүмкіндігі артады.
Қысқа да нұсқа. Жазылыңыз telegram - ға
Оқи отырыңыз 
