Павлодарда «Ғасыр қасіреті» спектаклі сахналанады
ПремьераҚазан айының 27-28 күндері Павлодар қаласындағы Ж.Аймауытов атындағы облыстық қазақ музыкалы-драма театрында «Ғасыр қасіреті» атты спектакль қойылады. Премьера көрнекті жазушы-драматург Рахымжан Отарбаевтың «Нашақор туралы новелла» драмасының желісімен әзірленген.
Театрдың 27-ші өнер маусымында сахналанғалы отырған спектакльдің желісінде қазақ қоғамының бас ауруына айналған нашақорлық дерті көрсетіледі. Драманың бас кейіпкері – Жылқытай есімді бір үйдің жалғыз баласы. Яғни, есірткіге тәуелділік оның бүкіл өмірін ойран, тағдырын талқан етеді. Сондай-ақ, аялап баққан ата-анасының басына да арылмас қайғы әкеледі.
Шығарманың басты мақсаты – есірткінің құрбаны болған тағдырлардың қандай болатынын көрсету және жастарға ой салу. Театрдың баспасөз хатшысы Мұхит Омаровтың айтуынша, қойылымның режиссері – алматылық Ержан Қауланов.
– Бұл туынды біздің көрермендерге алғаш рет ұсынылып отыр, – дейді Мұхит Омаров. – Есірткіге еліктеу, нашақорлықпен ауру бүгінгі қоғамның дерті. Онымен қалай күресуге болады, жастарымызды мұнан қалай сақтандыра аламыз? Осы тектес көкейтесті сұрақтар белгілі жазушы-драматург Рақымжан Отарбаевты да толғандырған болуы керек. Ал, мұндай спектакль біздің сахнада күнде қойыла бермейді. Сондықтан, жіберіп алмағанымыз жөн.
Әзірлеген Тұмар АСЫЛ
Қысқа да нұсқа. Жазылыңыз telegram - ға