Павлодар облысында моноқалаға жаңа әкім тағайындалды

Бүгін Павлодар облысының Ақсу қаласының жаңа әкімі лауазымдық міндетіне тағайындалды, деп хабарлайды El.kz ақпарат агенттігі. 

Жаңа әкімді өңір басшысы Асайын Байханов Ақсу активінің отырысында қаланың жаңа әкімін таныстырды. Жиында Нұрлан Дүйсенбиновтың Ақсу қаласының әкімі қызметінен өз еркімен босатылғанын хабарланды. Асайын Байханов оған қаланың әлеуметтік-экономикалық дамуына қосқан үлесі үшін алғысын білдірді.

Нұрлан Шайхсләмұлы Ақсуды 2022 жылдың наурыз айынан бастап басқарды. Осы уақыт ішінде қалада 524 пәтерлі 5 үй салынды, 40-тан астам көше жарықтандырылды, 6 ауылдық округте су құбырлары жаңғыртылды. Жағажай аумағы абаттандырылды, Ақсу қалалық ауруханасын ауданаралық орталық ауруханаға айналдыру жұмыстары басталды, «Ақсумолл» сауда орталығы ашылды, - деді өңір басшысы.

Облыс әкімінің өкімімен, ҚР Президенті Әкімшілігінің және Ақсу қалалық мәслихатының келісімімен Ақсу қаласының әкімі лауазымына Болатбек Шәріпов тағайындалды. Өңір басшысы жаңа әкімді таныстырып, жұмысына табыс тіледі.

Болатбек Шәріпов 1973 жылы Ертіс ауданының Заречное ауылында дүниеге келген. Білімі жоғары. Еңбек жолын 1992 жылы бастаған. Мемлекеттік қызметте 2008 жылдан бастап жұмыс істейді. Ертіс ауданында бөлім басшысынан аудан әкіміне дейінгі еңбек жолынан өтті. «Ерен еңбегі үшін» медалімен марапатталған.

Асайын Байханов Ақсудың облыс экономикасын дамытуда маңызды мәнге ие екенін атап өтті. Қалаға өңірдің өнеркәсіп көлемінің шамамен 25% тиесілі. Бірінші кезекте барлық инфрақұрылымдық және әлеуметтік жобаларды, сондай-ақ, түйінді мәселелерді талдауды тапсырды.

Сондай-ақ, қаланың жаңа әкіміне 6-7% тұрақты экономикалық өсімді қамтамасыз ету, Ақсу инвестициялық аймағын, инфрақұрылым мен агроөнеркәсіптік кешенді дамыту, тұрғындардың өзекті мәселелеріне уақтылы ден қою тапсырылды.

Қысқа да нұсқа. Жазылыңыз telegram - ға