Жаңалықтар

Туған өлке тарихы құпияларын аша отырып

Туған өлке тарихы құпияларын аша отырып
15.08.2018 10:45 1913

Облыстық Қазақстан халқы ассамблеясының ұйымдастыруымен ү.ж. 13 тамызында «Қазақстанның киелі жерлерінің географиясы» жобасы шеңберінде «Ұлы Дала Елі» тарихи-танымдық экспедициясы болып өтті. Ауқымды жоба өңірімізде екі жыл қатарынан жүргізіліп келеді.

Қызылорда облысы Қазалы, Қармақшы аудандарының киелі жерлері, тарихи-мәдени нысандарымен танысуға облыстық ҚХА хатшылығының меңгерушісі Л. Төрешова, «Қоғамдық келісім» КММ директоры У. Ибраев, директордың орынбасарлары Р. Ахметова және А. Жұмабаев, облыстық этномәдени бірлестіктердің және облыстық «Жаңғыру жолы» жастар қозғалысының белсенді мүшелері қатысты. 

Оғыз мемлекетінің саяси-рухани астанасы — Жанкент қалашығы тарихи-танымдық экспедицияның бастауы болды. Жанкент қалашығы (IX-XI ғ.ғ.) – Азия мен Еуропаны байла­ныстырған Ұлы Жібек жолы бойындағы ежелгі шаһар. Қалашықта зерттеу жүргізіп жатқан археолог-ғалымдар экспедиция мүшелеріне қаланың тарихы жайлы жаңаша ақпараттармен бөлісті.

Жанкент қалашығынан кейін экспедиция құрамы Қазалы  ауданында орналасқан Ғани Мұратбаев музейіне тоқтады. Қатысушылар көрнекті қоғам қайраткері, Қазалы өңірінің даңқты перзенті, Орталық Азия мен Қазақстан жастар қозғалысын ұйымдастырушыларының бірі, Шығыс жастарының көшбасшысы Ғ. Мұратбаевтың қолжазбалары мен жеке заттары және  құжаттамаларымен танысты. «Жаңғыру жолы» жастар қозғалысының мүшелері үшін дара тұлғаның өмір тарихы мен еңбек жолы ерекше әсер етті.

Саяхатшылардың келесі бағыты Әйтеке би кентінен батысқа қарай 4 шақырым жерде орналасқан Жанқожа батыр кесенесі болды. Экспедиция мүшелері кесенеге тоқтап, батырдың рухына тағзым етті. Кесене 1992 жылы өзінің бүкіл өмірін Арал маңы қазақтарының тәуелсіздігі жолындағы күреске арнаған Жанқожа Нұрмұхамедұлының құрметіне қойылған.

Топ мүшелерінің соңғы аялдамасы Қармақшы ауданы, Жосалы кентінен солтүстік-батысқа қарай 18 шақырым жерде орналасқан Қорқыт ата мемориалды кешені. Онда қобызды бейнелейтін төрт элементтен тұратын, әр тарапқа қаратып тұрғызылған құлпытастарға ұқсас — Стела, қошқар мүсіні, оңаша тілек тілейтін жер асты мінәжат үйі — Қылует, сондай-ақ, көне Рим дәуіріндегі архитектуралық құрылыс үлгісінде салынған түрлі ойындар мен сайыстарды тамашалауға арналған Амфитеатр орналасқан. Экспедиция мүшелері 3 экспозициялық залдан тұратын музеймен танысып, ондағы Қорқыт өмірі мен мәдениетінен сыр шертетін құндылықтар мен жәдігерлерді тамашалап, естелік суретке түсті.

Тарихи-танымдық саяхатқа қатысқан экспедиция мүшелері  өңіріміздегі тарихи жәдігерлерімен танысып қайтқандарына зор алғыстарын білдірді.

Бөлісу:
Telegram Қысқа да нұсқа. Жазылыңыз telegram - ға