Қандастар Ассамблея

Әскери жоғары оқу орындарына құжаттарды қабылдау басталды

23.05.2016 2670
Түлектерге құлаққағыс

Қазақстанда әскери жоғары оқу орындарына түсу үшін құжаттарды қабылдау басталды. Әскери оқу орынын таңдаған түлектер құжаттарын 15 маусымға дейін тапсырып үлгеруі тиіс.

 

ҚР Қорғаныс министрлігінің Баспаөз қызметінің хабарлауынша, жыл сайын әскери мамандыққа оқытатын білім ошақтарына 1 000-ға жуық азамат оқуға қабылданады. Арнайы тексеруден өткен, оқуға денсаулық жағдайы бойынша жарамды, ҰБТ-ның төрт пәні бойынша кем дегенде 50 ұпай жинаған оқуға түсетіндер еліміздің әскери жоғары оқу орындарына түсе алады.

Жыл сайын еліміздің әскери жоғары оқу орындарында оқытудың жаңа бағдарламалары қайта әзірленіп, енгізілуде. Енді ҚР Қорғаныс министрлігі әскери оқу орындарының курсанттары шет елдерінің әскери жоғары оқу орындарында оқуды жалғастыра алады. Бірінші курс аяқталғаннан кейін курсанттар шетел мемлекетінің әскери оқу орындарына оқуға іріктелу үшін медициналық куәландырудан өтеді.

 Осы жылы курсанттардың білім алуына жол ашқан жаңа мамандықтар енгізілгенін естеріңізге сала кетейік. Алғаш рет 2016-2017 жылдары Әуе қорғанысы күштерінің Әскери институтында әскери-медициналық факультет құрылады. 2016 жылдан бастап Құрлық әскерлерінің Әскери институты «Әскери істегі менеджмент», «Әскери істегі логистика», «Әскери істегі юриспруденция» сияқты мамандықтар бойынша курсанттарды даярлауды бастайды.

Радиоэлектроника және байланыс Әскери-инженерлік институтында «Әскери істегі радиоэлектроника мен инжиниринг» мамандығы бойынша дайындық басталды. Түлектер аталмыш мамандықтар бойынша әскери қызметті аяқтағаннан кейін азаматтық салада жұмыс жасай алады.

 

«Бүгінде әскери білім қарқынды дамуда. Оқыту сапасы жоғары деңгейге қойылған. Оқу бағдарламасына әскери әдеп, әскери істегі көшбасшылық пен басқару стилі. Осы факторлар курсанттардың жеке тұлғасын, көшбасшылық қасиеттері мен мінез-құлқын қалыптастырады», – деді ҚР ҚМ Білім және ғылым департаментінің бөлім бастығы полковник Әсет Ақкөзінов.  

 

Жыл сайын Қазақстанның әскери жоғары оқу орындарының курсанттары шетелдерде тағылымдамадан өтіп, тәжірибе жинақтап, өздерінің біліктіліктерін арттырады. Әскери жоғары оқу орындарының курсанттары үшін білім алуларына барлық жағдай жасалған. Толық әлеуметтік жиынтық, тегін оқу және тұру. Барлық бітірушілер оқуды тәмамдағаннан кейін 100 пайызбен жұмыспен қамтылып, әскери лауазымдарға тағайындалады.

Жалпы Қазақстанда қанша жоғары әскери оқу орыны бар, қалай оқуға қабылдануға болады, қандай талаптар қойылады, құжат қабылдау ережелері қандай, әскери білім алғанның қандай артықшылығы бар, қандай жеңілдіктер қарастырылған деген сауалдарға жауап іздесеңіз, келесі сілтемеге өтіңіз! Толық ақпарат ала аласыз!


Әзірлеген Бақытгүл АБАЙҚЫЗЫ

Ұқсас материалдар