Некеге тұру тәртібі өзгерді

Қытайда некеге тұру тәртібі жеңілдетілді, деп хабарлайды El.kz ақпарат агенттігі.

Xinhua News Agency мәліметінше, бұл бастама ел тұрғындарын некеге тұруға ынталандыру мақсатында қолға алынған. Жаңа ережелер, мысалы, құжат тапсыру рәсімін жеңілдетеді. Енді үйлену үшін мына құжаттар жеткілікті:

• Жеке басын куәландыратын құжат (төлқұжат немесе жеке куәлік);
• Қазіргі уақытта некеде еместігі туралы анықтама;
• Соңғы үш ұрпақ ішінде жақын туыстық байланыс жоқ екені туралы анықтама.

Бұған дейін жұптар үй шаруашылығын тіркеу кітаптарын да ұсынуы керек болатын. Енді бұл талап алынып тасталды.

Сонымен қатар, қытайлықтар енді тек тіркелген тұрғылықты мекенжайы бойынша ғана емес, басқа аймақтарда да некеге тұра алады.

Билік бұл өзгерістер некеге тұруға кететін уақыт пен шығынды азайтады деп сенеді, өйткені көптеген азаматтар тіркелген жерінен алыс аймақтарда тұрып, жұмыс істейді. Бұған дейін туған қаласына оралу қажеттігінен бас тартып, үйленбей жүргендер де көп болған.

Сарапшылардың пікірінше, некенің азаюы – некеге жарамды жастағы халық санының қысқаруы, қарым-қатынасқа деген көзқарастың өзгеруі және отбасын құруға кететін шығындардың артуымен де байланысты.

Қысқа да нұсқа. Жазылыңыз telegram - ға