Небәрі 1500 тұрғыны бар ауылдан шыққан клуб Швеция чемпионы атанды
Халлевик елді мекенінен шыққан «Мьелльбю» футбол клубы тарихында алғаш рет Швеция чемпионы атанды, деп хабарлайды El.kz интернет порталы.
27-турда өткен матчта «Мьелльбю» сырт алаңда «Гётеборгті» 2:0 есебімен жеңіп, өз тарихындағы ең ірі жетістікке жетті. Команда 66 ұпай жинады. Екінші орында тұрған Стокгольмнің «Хаммарбю» ұжымы көшбасшыдан 11 ұпайға артта келеді және қалған үш ойында ары кетсе 9 ұпай ғана жинай алады.
«Мьелльбю» 1939 жылы құрылған. Бұған дейін клубтың чемпионаттағы ең жоғары нәтижесі өткен маусымдағы бесінші орын еді. Сондай-ақ 2023 жылы команда Швеция кубогының финалына дейін жетіп, «Хеккенге» 1:4 есебімен жол берген.
Бір қызығы, 2023 жылы жүргізілген санақ қорытындысы бойынша Халлевик елді мекенінде бар болғаны 1 500 адам тұрады екен.
«Мьелльбю» – Швеция премьер-лигасындағы бюджеті ең аз клубтардың бірі. Команданың өз алаңы – 6 750 жанкүйерге арналған шағын стадион.
Клубтың бас бапкері – 59 жастағы Андерс Торстенссон. Ол команданы 2023 жылдан бері жаттықтырып келеді. Сол жылы бапкерге созылмалы лимфолейкоз диагнозы қойылған.
Биылғы маусымда «Мьелльбю» 27 матчтың біреуінде ғана – 11 мамырда АИК-тен (1:2) жеңіліп, 20 ойында жеңіске жетсе, 6 рет тең түскен. Команда 19 матч қатарынан жеңілмей келеді.
Швеция чемпионы атанғаннан соң «Мьелльбю» келесі маусымда Чемпиондар лигасының іріктеу кезеңінде өнер көрсетеді.
Қысқа да нұсқа. Жазылыңыз telegram - ға
Оқи отырыңыз 
