Ғылыми ортада өткен жылы ерекше «жетістігімен» танылған Пеппер есімді мысық тағы да жұртты таңғалдырды, деп хабарлайды El.kz интернет порталы.
Бұл жолы ол Эверглейдс ұлттық паркінде табылған өлі қысқақұйрық жертесер — жаңа ортореовирус штаммының анықталуына түрткі болды. Бұл жаңалық Microbiology Resource Announcements (MRA) журналында жарияланды.
Мысық иесі — белгілі вирусолог
Пеппердің иесі — Флорида университетінің вирусологы Джон Ледники. Ол жабайы жануарлар арқылы таралатын вирустарды зерттеу аясында жертесердің денесін зерттеген. Нәтижесінде, жануар ағзасынан бұрын-соңды белгісіз болған вирус табылған. Бұл жаңа вирусқа Gainesville shrew mammalian orthoreovirus type 3 strain UF-1 атауы берілді.
Вирус адамдарға қауіпті болуы мүмкін бе?
Зерттеушілердің айтуынша, бұл вирус қазіргі уақытта қауіп төндірмесе де, ортореовирустар сирек жағдайларда адамдарда, әсіресе балаларда, ауыр сырқаттарға — менингит, энцефалит және асқазан-ішек жолдарының бұзылуына себеп болуы мүмкін. Бұрын олар «зиянсыз» вирустар санатына жатқызылған, алайда соңғы деректер олардың қауіпті болуы мүмкін екенін көрсетіп отыр.
Ортореовирустардың ерекшелігі
Джон Ледникидің түсіндіруінше, ортореовирустар бір жасушаға түскен кезде бір-бірімен генетикалық материал алмасып, жаңа штамдар түзуге қабілетті. Бұл қасиеті оларды тұмау вирусына ұқсатады — нәтижесінде әлдеқайда жұқпалы немесе қауіпті нұсқалар пайда болуы ықтимал.
Бұған дейін Ледники бастаған ғылыми топ ақбөкен мен бұғы тәрізді жабайы жануарлардан табылған сирек вирустар туралы бірнеше мақала жариялаған. Енді бұл тізімге Пеппер тапқан жаңа вирус та қосылды.
Қоршаған ортаны мұқият бақылай білсек, үнемі жаңа нәрселер ашамыз. Сол себепті зерттеуді жалғастыра береміз, — дейді вирусолог.
Пеппер ғылымға қызмет етуді жалғастыра ма?
Ғалымдардың айтуынша, Пеппердің денсаулығы жақсы, әрі ол өз "сүйікті" ісін алдағы уақытта да жалғастыратыны сөзсіз.
Қысқа да нұсқа. Жазылыңыз telegram - ға
Оқи отырыңыз 
