Миллиондаған доллар: Қазақстан бьюти-тауарларын қай елдерге экспорттайды
Қазақстанда косметика мен парфюмерия экспорты өсіп келеді – дәл осы тауарлар 8 наурыз қарсаңында жиі сыйлыққа берілетін өнімдердің қатарында. Ал шоколадты шетелге жіберу, керісінше, азайған. Мұндай деректерді LS келтіреді, деп хабарлайды El.kz.
2025 жылдың қорытындысы бойынша Қазақстаннан 3 мың тоннадан астам косметика мен тері күтіміне арналған құралдар экспортталған. Жалпы жеткізілім көлемі шамамен 89 миллион долларды құрады. Бұл алдыңғы жылмен салыстырғанда шамамен бір жарым есе көп.
Қазақстандық косметиканың негізгі сатып алушысы – Ресей. Бұл елге шамамен 1,9 мың тонна өнім жіберілген. Сонымен қатар Өзбекстан, Беларусь және Қырғызстанға жеткізілім айтарлықтай артқан.
Қазақстандық кремдер мен күтім құралдарын Әзербайжан, Армения, Моңғолия және Грузия да сатып алған. Тіпті өнімнің шағын партиялары Еуропа елдеріне – мысалы, Болгария мен Венгрияға да жөнелтілген.
Парфюмерия экспорты да айтарлықтай өскен. Бір жыл ішінде шетелге шамамен 1,5 мың тонна әтір мен дәрет суы жеткізілген. Бұл 2024 жылмен салыстырғанда екі есеге жуық көп. Осы нарықта қазақстандық компаниялар 89 миллион доллардан астам табыс тапқан.
Парфюмнің басым бөлігі де Ресейге жөнелтілген. Ал шағын көлемде Қырғызстан, Германия, Молдова және Өзбекстан сатып алған.
Ал шоколадқа қатысты жағдай керісінше. Қазақстандық тәтті өнім экспорты 30 пайыздан астамға қысқарған. 2025 жылы шетелге шамамен 24 мың тонна шоколад жіберілген. Ал бір жыл бұрын бұл көрсеткіш 35 мың тоннадан асқан еді.
Сарапшылар мұны ел ішіндегі өндірістің қысқаруымен байланыстырады. Әсіресе Қытай, Моңғолия және Грузияға жеткізілім айтарлықтай азайған. Қырғызстан да сатып алуды қысқартқан.
Дегенмен кейбір елдерде қазақстандық шоколадқа қызығушылық керісінше артқан. Мысалы, Ресейге экспорт 8,9 мың тоннаға дейін өскен. Сондай-ақ Беларусь, Түрікменстан, Өзбекстан және Әзербайжан қазақстандық шоколадты көбірек сатып ала бастаған. Оңтүстік Кореяға жеткізілім де артқан.
Қазақстандықтар шетелдік косметиканы жиі сатып ала бастады
Импортқа келсек, өткен жылы қазақстандықтар шетелдік косметика мен шоколадты жиірек сатып алған. Ал парфюмерия импорты аздап төмендеген.
Қазақстанға әтір мен дәрет суын жеткізетін негізгі елдер – Польша, Франция және Чехия. Сондай-ақ өнімді Қытай, Испания, Түркия және АҚШ та жеткізеді.
Жалпы елге шамамен 4,3 мың тонна парфюмерия импортталған. Бұл алдыңғы жылмен салыстырғанда 13,7 пайызға аз.
Ал косметика импорты, керісінше, өскен. Бір жыл ішінде Қазақстанға 23 мың тоннадан астам күтім құралдары әкелінген. Бұл 2024 жылмен салыстырғанда 17 пайызға көп.
Негізгі жеткізушілер – Ресей мен Қытай. Сонымен қатар косметика Польша, Оңтүстік Корея, Франция, АҚШ, Германия және Италиядан да белсенді импортталады. Шағын партиялар Испания, Жапония, Израиль және Монакодан келеді.
Шоколад импорты да артқан. 2025 жылы Қазақстанға 95 мың тоннадан астам тәтті өнім әкелінген. Оның жалпы құны 528 миллион доллардан асқан.
Шоколадтың ең үлкен жеткізушісі – Ресей. Сондай-ақ ірі жеткізушілер қатарында Украина, Түркия, Германия, Италия, Австрия, Польша және Бельгия бар.
Қысқа да нұсқа. Жазылыңыз telegram - ға
Оқи отырыңыз 
