Мемлекеттік қызметкерлердің жартысынан астамы – әйелдер
Ұлттық экономика министрі Әлібек Қуантыров Қазақстандағы гендерлік теңдік туралы баяндады, деп хабарлайды El.kz ақпараттық агенттігі.
Ұлттық экономика министрі атап өткендей, Қазақстан тең құқықтары мен мүмкіндіктері бар қоғамды қалыптастыруда елеулі табыстарға қол жеткізді. 2015 жылы Қазақстан Біріккен Ұлттар Ұйымының Орнықты даму саласындағы мақсаттарын іске асыру жөніндегі міндеттемелерді өзіне қабылдады. Сондағы 17 мақсаттың 12-сі гендерлік-сезімтал болып табылады.
«Орнықты даму мақсаттары бойынша Прогресс индексі» рейтингі 115 көрсеткiштi қамтиды. 2022 жылы Қазақстан рейтингтегі позицияны 12 орынға жақсартты. 2019 жылмен салыстырғанда 77-орыннан 65-інші орынға көтерілді. Өткен жылы «Гендерлік алшақтық индексі» рейтингі бойынша Қазақстан гендерлік даму саласындағы табысты реформалардың арқасында 15 позицияға көтеріліп, рейтингте 146 елдің ішінен 65-інші орынды иеленді.
Қазақстан гендерлік зорлық-зомбылықты жою жөніндегі Іс-қимыл Коалициясының қатысушысы болып табылады. Оның мақсаты - теңдікті қамтамасыз ету жолындағы ең қиын кедергілерді жою.
Сондай-ақ, еліміз БҰҰ-ның 2022-2024 жылдарға арналған Адам құқықтары жөніндегі Кеңесінің мүшесі және онда гендерлік теңдік пен әйелдердің құқықтарын кеңейту басымдырақ болып табылады. Сонымен қатар, әйелдердің саяси ілгерілеуі, корпоративтік өсуі және дамуы қамтамасыз етілуде.
«Статистикаға сәйкес, мемлекеттік қызметтегі әйелдердің үлесі 2010 жылы 52,7%-ды құраса, 2022 жылы 55,4%-ға дейін өсті. Оның ішінде 39,2% басшы лауазымында. Саяси лауазымдарда 59 әйел жұмыс істейді. Оның ішінде министрлер, Агенттіктің, Жоғары аудиторлық палатаның және Конституциялық соттың төрағалары, Сенат төрағасының орынбасарлары, облыстар мен қала әкімдерінің орынбасарлары, аудан әкімдері бар», - деді министр.
ҰЭМ басшысының мәліметінше, шағын және орта бизнестегі әйелдердің үлесі 2011-2021 жылдар аралығында 38,4%-дан 44,6%-ға өсті. Елімізде кәсіпорын басшыларының 30,8%-ы әйелдер. Үкімет мемлекеттік қатысуы бар компаниялардың басшы органдарындағы әйелдердің үлесін кезең-кезеңімен 30%-ға дейін арттыруға бағытталған шаралар қабылдауда. Әйелдер кәсіпкерлігін қолдау қаржылай және қаржылай емес шаралар арқылы жүзеге асырылуда. Сыйақы мөлшерлемесін субсидиялау шеңберінде 6 мың жоба, кредиттерге кепілдік беру бойынша 4 мың жоба қолдау тапты. Сонымен қатар, ҚР ҰЭМ Еуропа қайта құру және даму банкімен бірлесіп, «Бизнестегі әйелдер» бағдарламасын іске асыруда.
«Тұрақты экономикалық өсудің маңызды факторларының бірі ретінде іскерлікті арттырудағы әйелдердің қосқан елеулі үлесін атап өткім келеді. Әйелдердің саясаттағы рөлі және олардың белсенді қатысуы қоғамдық өмірдің басқа салаларында да гендерлік теңдікті жақсартуға ықпал етеді», - деді ведомство басшысы.
Қысқа да нұсқа. Жазылыңыз telegram - ға