Медиа мен қоғамды жақындатқан күш: ҚХА Журналистер клубының миссиясы
Қазақстан халқы Ассамблеясы – ширек ғасырдан астам уақыт бойы елдегі бейбітшілік пен қоғамның тұрақтылығын сақтаудың айрықша институты. Қоғамдағы түрлі этностардың мәдениеті мен дәстүрін ұлықтап, татулық пен түсіністікті нығайтуға бағытталған бұл бірегей құрылым бүгінде ел дамуы мен рухани жаңғыру үдерісінің маңызды бөлігіне айналды. Ассамблеяның құрамындағы 4 мыңнан астам қоғамдық құрылым 50 мыңнан астам белсенді азаматты біріктіріп, елдің әр өңірінде сан алуан әлеуметтік, мәдени, білім беру бағытындағы жобаларды іске асырып келеді.
Осындай ауқымды жұмыстың ішінде ерекше орын алатын бір құрылым – ҚХА Журналистер клубы. 2009 жылы құрылған бұл клуб ақпарат кеңістігіндегі отаншылдық ұстанымды, этносаралық келісімнің маңызын, мемлекеттік саясаттың негізгі бағыттарын түсіндіруде және қоғамға сапалы контент ұсынуда айрықша рөл атқарып келеді. Ширек ғасырға жуық уақыт ішінде Клуб медиа саласының кәсіби өкілдерін біріктіріп, ортақ мақсат жолында табысты жұмыс істеудің үздік үлгісін көрсетіп отыр.
Ел көлеміндегі 500-ге жуық журналисті біріктірген бірегей платформа
Бүгінде ҚХА Журналистер клубының құрамында еліміздің барлық өңірінен жиналған 500-ге жуық белсенді журналист бар. Бұл – телевизия, радио, баспасөз, онлайн-медиа, блогерлер мен жаңа медиа өкілдерін қамтитын тұтас қауымдастық. Клуб өңірлік деңгейде де қарқынды жұмыс істеп, аймақтарда арнайы бөлімшелер құрылған. Олар жергілікті ақпарат құралдарымен тығыз байланыста жұмыс істеп, Ассамблея саясатын халыққа дұрыс әрі түсінікті тілмен жеткізуге атсалысады.
Клуб жұмысының басты ерекшелігі – медиа өкілдерінің кәсіби әлеуетін арттыру, олардың өзара тәжірибе алмасуына жағдай жасау және этносаралық қатынастар тақырыбында сапалы журналистиканы дамыту. Осы мақсатта жыл сайын ондаған семинар, тренинг, воркшоп, шығармашылық байқаулар ұйымдастырылады. Әдістемелік құралдар мен кітапшалар шығарылып, журналистердің кәсіби деңгейін арттыруға қажетті контент ұсынылады.
Бір жылдың өзінде — 150-ден аса іс-шара, 10 мыңнан астам қатысушы
2024 жылдың өзінде Клуб мүшелері республика көлемінде 150-ден астам ауқымды іс-шара өткізіп, 10 мыңнан астам адамды қамтыған. Бұл – өңірлік кездесулер, тренингтер, форумдар, шығармашылық жобалар, этножурналистика бағытындағы зерттеу жұмыстарынан тұратын үлкен комплекс.
Этножурналистикаға арналған республикалық медиафорум
Қыркүйек айында Астана қаласында өткен республикалық медиафорум – осы жылдың ең маңызды шараларының бірі. Форумға еліміздің барлық өңірінен 100-ден астам журналист қатысты. Олар этножурналистикадағы заманауи трендтерді, мәдениетаралық коммуникация принциптерін, қоғамдық келісім мен бірлік мәселелерін кәсіби тұрғыда талқылады.
Форум «ҚХА академиясы» жобасы аясында үш күндік арнайы оқу бағдарламасымен толықты. Қатысушылар сертификаттар алып, этносаралық журналистиканың терең мазмұнын меңгерді.
Жасанды интеллект және медианың жаңа бағыттары
Ал қазан айында Алматыда өткен кездесуде медиа мамандары жаңа технологиялардың, әсіресе жасанды интеллектінің заманауи журналистикаға ықпалы туралы пікір алмасты.
Журналистер ақпаратты тексеру әдістерін, фейктермен күрес тәсілдерін, этикалық нормаларды сақтау, авторлық құқық және контент жасаудағы AI-дың жауапкершілік мәселелерін жан-жақты талдап, тәжірибелі медиа сарапшылардың шеберлік сабақтарына қатысты.
Өңірлердегі үздік жобалар – Клуб жұмысының нақты нәтижесі
ҚХА Журналистер клубы тек теориялық дайындықпен шектелмей, әр өңірде дербес шығармашылық жобаларды жүзеге асырып келеді.
Мысалы:
- Астана қаласы – «Тұлға тағдыр», «Бірлік Talks» жобалары
- Шығыс Қазақстан – «ЭтноEvent», «ЭтноHistory» айдарлары
- Түркістан облысы – «Жол-жөнекей» бағдарламасы
- Қарағанды облысы – «Достық дастарханы» тележобасы
- Жетісу облысы – «Ortaq» подкасты
- Жамбыл облысы – «Ұлы дала аңыздары» атты анимациялық жоба
- Қызылорда облысы – «Two Stars» фестивалі
- Ақтөбе облысы – «LEVEL UP» жобасы
Бұл жобалар қоғамға бейбітшілік құндылықтарын дәріптеп қана қоймай, өңірлік медиа контенттің дамуына серпін беріп отыр.
«Ассамблея айнасы» – этномәдени саясатты түсіндіретін бірегей жоба
Клубтың соңғы жылдары табысты жүзеге асырып келе жатқан маңызды бастамаларының бірі – «Ассамблея айнасы» жобасы.
Бұл аяда клубтың белсенді мүшелері этносаралық қатынастарды нығайтуға бағытталған мемлекеттік саясаттың негізгі қыр-сырын түсіндіретін бейнесабақтар, лекциялар, аналитикалық роликтер дайындайды. Жоба мемлекеттік қызметкерлерге, педагогтарға, журналистерге, жастар ұйымдарына және көпшілікке арналған.
Бірлік – ел дамуының берік тірегі
Халқымызда «Саусақ бірікпей, ине ілікпейді» деген даналық бар. Бұл нақыл сөз қоғамның да, мемлекеттің де ортақ ұстанымын айқын бейнелейді. Егер ел азаматтары бір-біріне қолдау көрсетіп, тілге, дінге, руға бөлінбей, ортақ мақсатқа – Қазақстанның дамуына қызмет етсе, онда ғана өркениетті, тұрақты, қуатты мемлекет қалыптасады.
ҚХА Журналистер клубының көпжылдық қызметі дәл осы идеяға негізделген. Журналистер тек ақпарат таратушы ғана емес, қоғамға ықпал ететін ой көшбасшылары. Сол себепті олардың ел бірлігін нығайтуға қосқан үлесі – аса маңызды.
Қысқа да нұсқа. Жазылыңыз telegram - ға
Оқи отырыңыз 
