«Мажорлар дәуірі бітті»: Алматыдағы апаттан кейін депутат мәлімдеме жасады
EL.KZ Информационно-познавательный портал
Алматыдағы адам өліміне әкелген жантүршігерлік жол-көлік оқиғасы қоғамда үлкен резонанс туғызып, құқық қорғау жүйесіндегі өзекті мәселелерді қайта күн тәртібіне шығарды. Мәжіліс депутаты Бакытжан Базарбек бұл қайғылы жағдайдан кейін Ішкі істер органдарында ауқымды өзгерістер қажет екенін мәлімдеп, жүйені толық тазарту керектігін ашық айтты.
Депутаттың пікірінше, бұл апат бір ғана жол-көлік оқиғасы емес, бұл – құқық қорғау органдарындағы жүйелі проблемалардың айқын көрінісі. Ол өз сөзінде бай әрі ықпалды адамдардың балалары, яғни қоғамда «мажорлар» деп аталатын топтың заңды елемей, жауапкершіліктен жалтарып жүргенін сынға алды. Базарбектің айтуынша, мұндай жағдай тек Алматыда ғана емес, елдің барлық өңірінде кездеседі.
Ауқымды тазарту қажет. Бұл тек Алматыға ғана қатысты емес, бүкіл Қазақстан бойынша жүргізілуі тиіс. Біз ішкі істер органдарын осындай «мажорларды» қорғайтын адамдардан тазартуымыз керек. 90-жылдардағы «мажорлар» заманы өтті, – деді Базарбек.
Сонымен қатар депутат өзінің жеке тәжірибесімен де бөлісті. Ол Алматыдағы Әл-Фараби даңғылы маңында тұратынын айтып, күн сайын элиталық көліктердің жоғары жылдамдықпен жүйіткіп жүретінін көретінін жеткізді. Алайда мұндай заң бұзушылықтар үшін нақты жауапкершілікке тартылғандарды байқамағанын атап өтті.
Мен өзім Алматыда, Әл-Фараби бойында тұрамын. Күн сайын спорткарлар мен қымбат көліктердің қалай жүйіткіп жүргенін көремін. Бірақ біз олардың жазаланғанын көрмейміз. Ешкімді жауапқа тартпайды, ешкімді жұмыстан босатпайды. Сондықтан бұл мәселе тек бір қала деңгейінде емес, бүкіл ел бойынша қаралуы тиіс, – деді ол.
Депутат сондай-ақ бұл мәселе бойынша Мәжіліс депутаттары Президентке жүгініп, Ішкі істер министрлігіне қатысты қатаң шаралар қабылдауды талап етуге дайын екенін жеткізді. Бұдан бөлек, ол амнистия мәселесіне де тоқталып, жол қозғалысы ережелерін өрескел бұзатын азаматтарға жеңілдік жасауға қарсы екенін білдірді.
Бұл оқиға амнистия туралы заң жобасын қарау кезінде міндетті түрде ескерілуі керек. Мен жеке өзім жол ережесін өрескел бұзатын адамдардың амнистияға ілінуіне қарсымын, – деді Базарбек.
Айта кетейік, резонанс тудырған жол-көлік оқиғасы 20 наурыздан 21 наурызға қараған түні, шамамен сағат 03:30-да Алматы қаласындағы Әл-Фараби даңғылы мен Мендіқұлов көшесінің қиылысында болған. Алдын ала мәліметтерге сәйкес, Zeekr 009 автокөлігінің жүргізушісі басқаруды жоғалтып, қарсы жолаққа шығып кеткен. Соның салдарынан Mercedes-Benz көлігімен бетпе-бет соқтығысқан.
Апат салдарынан Mercedes-Benz көлігінің жүргізушісі мен екі жолаушысы оқиға орнында көз жұмды. Ал Zeekr көлігінің жүргізушісі түрлі жарақаттармен ауруханаға жеткізілген.
Кейін Алматы қалалық полиция департаменті жүргізген тексеріс барысында Әл-Фараби даңғылында заңсыз түнгі жарыстар ұйымдастырылғаны анықталған. Кейбір жүргізушілердің жылдамдығы сағатына 250 шақырымға дейін жеткені белгілі болды. Бұл дерек жол қауіпсіздігіне қатысты бақылаудың әлсіздігін тағы бір мәрте көрсетті.
Осы оқиғаға байланысты Ішкі істер министрі Ержан Сәденов арнайы мәлімдеме жасап, істің ерекше бақылауға алынғанын айтты. Оның сөзінше, кінәлілердің ешқайсысы жазадан құтылмайды.
Ешкім жауапкершіліктен құтылмайды. Заң бәріне бірдей. Қазіргі таңда жан-жақты тексеру жүргізіліп жатыр, – деді министр.
Министрдің тапсырмасымен Алматыға Ішкі істер министрлігінің бірқатар құрылымдық бөлімшелерінен арнайы қызметкерлер жіберілген. Олардың қатарында департаменттің өзіндік қауіпсіздік қызметі, әкімшілік полиция комитеті және кадрлық жұмысқа жауапты бөлімдер бар. Сонымен қатар, Алматы қалалық полиция департаментінің бірқатар басшылары қызметінен босатылғаны белгілі болды.
Ресми мәліметке сәйкес, апатқа себеп болған жүргізуші оқиға кезінде алкогольдік масаң күйде болған. Бұл туралы ІІМ өкілдері растады. Қазіргі уақытта барлық мән-жайлар жан-жақты тексеріліп, қосымша тергеу амалдары жүргізілуде.
Бұл қайғылы жағдай қоғамда үлкен наразылық тудырып, әлеуметтік желілерде қызу талқылануда. Көпшілік «заң бәріне бірдей ме?» деген сұрақты қайта көтеріп, әсіресе ықпалды адамдардың балаларына қатысты жауапкершілік мәселесін сынға алуда.
Осылайша, Алматыдағы қайғылы жол апаты тек бір оқиға шеңберінде қалмай, елдегі құқықтық тәртіп, әділдік және жауапкершілік мәселелерін кеңінен талқылауға себеп болды. Сарапшылар мен депутаттар бұл жағдай жүйелі өзгерістерді талап ететінін айтып, алдағы уақытта құқық қорғау саласында нақты реформалар болуы мүмкін екенін жоққа шығармайды.
Оқи отырыңыз 
