Маңғыстауда су тарту арналарының инфрақұрылымын дамытудың екі кезеңдік жобасы ұсынылды
Маңғыстауда үздіксіз электрмен жабдықтауды қамтамасыз етуге бағытталған ЖЭО-1 және ЖЭО-2 су тарту арналарының инфрақұрылымын дамытудың екі кезеңдік жобасы ұсынылды, деп хабарлайды El.kz ақпарат агенттігі Маңғыстау облысы әкімінің баспасөз қызметіне сілтеме жасап.
Маңғыстаудың негізгі инфрақұрылымдық нысандары - ЖЭО-1 және ЖЭО-2 су жинау арналарының жұмысына Каспий теңізінің таяздануына байланысты қауіп төнуі мүмкін. Су тарту арналарының инфрақұрылымын дамыту өңірді сенімді энергиямен жабдықтауды қамтамасыз етеді. Бұл инфрақұрылымды жаңғыртудағы және өңірдің энергетикалық тұрақтылығын арттырудағы маңызды қадам. Жобаның барысы бүгін аймақ басшысы Нұрлан Ноғаевтың қатысуымен өткен жиында айтылды.
ЖЭО-1-дің үздіксіз жұмысын қамтамасыз ету үшін екі сатылы жоба ұсынылады. Бірінші кезең 1-ЖЭО объектісінде Каспий теңізінен реконструкцияланатын теңіз сорғы станциясына дейінгі ұзындығы 1,4 км су құбырын салуды қамтиды.
Жобаның екінші кезеңінде Ақтау халықаралық теңіз портының солтүстік шекарасы ауданында су тарту арнасын салу көзделіп отыр. Бұл кезең ЖЭО-1 су қабылдау каналын теңізде 700 метрге ұзартуды қамтиды.
Сондай-ақ, бұл мәселені шешу үшін «МАЭК» ЖШС арна түбіндегі шөгінділерден тазарту жұмыстарын жүзеге асыруда. Жер снарядтың көмегімен 550 метр тазартылды,ал қалған 50 метр канал мен 100 метр аванкамера өңдеу процесінде. Сонымен қатар, экскаватор ені 1,5 метр және тереңдігі 3 метр болатын 120 метрлік траншеяны тазартты.
Бұған қоса, Каспий теңізінің деңгейі төмендеген кезде теңіз суының тұрақты берілуін қамтамасыз ету үшін ЖЭО-2 су алу каналының өткізу қабілетін арттыру бойынша жобалар әзірленуде. Қазіргі уақытта бұл арнадағы су деңгейі 1,5-4 метрді құрайды.
Жобалармен танысып, зерделегеннен кейін Нұрлан Ноғаев ЖЭО-1 және ЖЭО-2 жұмыстарын оңтайландыру үшін бірқатар тапсырмалар берді.
Біздің басты мақсатымыз-МАЭК-тың үздіксіз жұмысын қамтамасыз ету. Біз аймақ тұрғындарының суға, электр энергиясына және жылуға әрқашан сенімді қол жеткізуін қамтамасыз етуге тырысамыз. Осы мақсатқа жету үшін біз кешенді жұмыс жүргізіп жатырмыз. Дегенмен, жобаларды әзірлеу процесін жеделдету қажет. ЖЭО-1 бойынша жобалар жеткіліксіз пысықталған. Мұнда тәжірибелі мамандар қажет. Қажет болған жағдайда мердігердің жауапкершілігі мәселесін қарастырамыз. Ресурстарды тиімді пайдалану және жұмысты сапалы орындау маңызды, - деп атап өтті Нұрлан Ноғаев.
Қысқа да нұсқа. Жазылыңыз telegram - ға