Маңғыстау әлемдік деңгейдегі көлік-транзит торабына айналады – президент
Бұл туралы мемлекет басшысы Маңғыстау облысының жұртшылығымен кездесуінде айтты
Президент Маңғыстау облысының көлік-логистикалық және инвестициялық әлеуетін арттыру керектігін айтты, деп хабарлайды El.kz. Бұл туралы мемлекет басшысы Маңғыстау облысының жұртшылығымен кездесуінде айтты.
Қасым-Жомарт Тоқаевтың пайымынша, Маңғыстау – географиялық тұрғыдан ұтымды жерде орналасқан өңір. Бұл өлкені әлемдік деңгейдегі көлік-транзит торабына айналдыру керек.
«Портты қала Ақтау – Қазақстанның теңізге шығатын қақпасы. Жаһандық логистикалық жүйе қайта қалыптасып жатқан қазіргі кезде Каспий теңізінің маңызы күрт арта түсті. Порттың инфрақұрылымын дамыту үшін инвестиция тартуды, контейнерлік және көлік-логистикалық хаб құруды көздеп отырмыз», - деді ол.
Мемлекет басшысы қазіргі әлемдік нарықтағы ахуалды ескеріп, Транскаспий бағдарын одан әрі дамыту өте маңызды екенін алға тартты.
«Осы мәселе бойынша серіктес елдермен өзара түсіністік бар. Ақтау және Құрық порттарының қуатын арттыратын болдық. Бұл олардың өткізу мүмкіндігін жетілдіріп, мұнай тасымалдау көлемін жылына 20 миллионға дейін жеткізу үшін қажет», - деді Президент.
Қасым-Жомарт Кемелұлы аймақтағы автомобиль жолдарының сапасын жақсартуға ерекше мән берілетінін де мәлімдеді. Ол бұған дейін «Бейнеу-Шалқар» тас жолы құрылысының маңыздылығы жөнінде айтқанын еске салды.
»Жұмыс өте баяу жүріп жатыр. Үкіметке құрылысты бастау үшін қажетті құжаттарды жедел дайындауды тапсырамын. Өңір тұрғындары облыстық деңгейдегі жолдың сапасы жөнінде жиі шағым айтады. Үкімет әкімдікпен бірлесіп, «Ақтау – Форт-Шевченко», «Таушық-Шетпе» жолдарын жөндеуге келесі жылдан бастап кірісуі керек. Жол сапасы – әр аймақтың даму деңгейін айқындайтын басты көрсеткіштің бірі. Азаматтар дамудың нәтижесін жиналыстарда емес, күнделікті өмірде көріп, сезінуі қажет. Сондықтан экономиканың тұрақты дамуына тың серпін беру үшін облыстың инвестициялық әлеуетін арттырған жөн», - деді Мемлекет басшысы.
Қысқа да нұсқа. Жазылыңыз telegram - ға