Криптонарықтағы сенсация: Биткоин бағасы шарықтады
Ақмарал Ағзамқызы El.kz тілшісі
Биткоин нарығында тағы бір маңызды оқиға тіркелді. 2025 жылдың 10 шілдесінде әлемдегі ең ірі криптовалютаның бағасы алғаш рет 117 мың доллар межесінен асып, CoinMarketCap деректері бойынша бір биткоиннің құны 117 620 долларға жетті. Бұл тәуліктік өсімнің 5,96%-ға тең екенін көрсетеді, деп хабарлайды El.kz интернет порталы.
Сарапшылар биткоин бағасының күрт өсуін бірнеше негізгі фактормен байланыстырады.
Биткоин неге қымбаттап жатыр?
Біріншіден, АҚШ-тағы саяси өзгерістер және президент Дональд Трамптың криптоиндустрияға деген ашық қолдауы инвесторлардың сенімін арттырды. Трампқа тиесілі Trump Media & Technology Group, Truth Social әлеуметтік желісін басқарумен қатар, енді биткоинге бағытталған криптовалюталық ETF құруды жоспарлап отыр. Бұл жоспар нарықтағы оптимизмді одан әрі күшейтті.
Екіншіден, институционалдық инвесторлардың биткоинге деген қызығушылығы артуда. Professional Capital Management инвестициялық компаниясының басшысы Энтони Помплиано жақында берген сұхбатында былай деді:
Биткоин — өскен сайын тәуекелі төмендейтін бірегей актив.
Ол биткоиннің ұзақмерзімді әлеуетіне сенім білдіріп, оның болашағына оптимистік көзқарас танытты.
Инвесторлардың қызығушылығы
Қазір биткоинге ірі компаниялар мен қаржылық ұйымдар қатты қызығып жатыр. Мысалы, АҚШ-тағы биткоин қорлары күнде 1 миллиард долларға жуық ақша тартып жатыр. Бұл қорлар ақшаға биткоин сатып алады, бұл бағаны өсіреді. Ең үлкен қор – BlackRock, ол 144 миллиард долларлық биткоинді басқарады.
Ірі компаниялар не істеп жатыр?
Кейбір ірі компаниялар биткоинді көптеп сатып алуда. Мысалы, Майкл Сэйлор басқаратын Strategy компаниясы барлық биткоиннің 3%-ын иеленген. Олар акциялар мен облигациялар шығарып, сол ақшаға биткоин сатып алады. Қазір олардың пайдасы 24 миллиард доллардан асады! Басқа да көптеген компаниялар осы жолды ұстанып жатыр.
Биткоиннің тарихы
Биткоиннің бағасы бұған дейін де бірнеше рет шарықтаған. Шамамен әр 4 жыл сайын баға жаңа рекорд орнатады, содан кейін төмендейді, бірақ қайта өседі. Соңғы рекорд 2021 жылы болды – 69 мың доллар. 2024 жылы Дональд Трамп АҚШ сайлауында жеңгеннен кейін биткоин бұл көрсеткішті жаңартты.
2025 жылы не болып жатыр?
Биыл биткоин бағасы қаңтар және мамыр айларында екі рет жоғары деңгейге жетті. Бірақ қазіргі өсу – ең күшті әрі тұрақты. Егер осы қарқын сақталса, биткоин бағасы одан әрі өсуі мүмкін.
Қысқа да нұсқа. Жазылыңыз telegram - ға
Оқи отырыңыз 
