Оңтүстік Корея Республикасының Қазақстандағы Төтенше және Өкілетті Елшісі Дэсик Ким мырза Ақтөбедегі Достық үйінде өңірдегі корей этносының өкілдерімен кездесті.
«Ақтөбе облысы кәрістер қауымдастығы» қоғамдық бірлестігінің төрағасы К. Цхай корей делегациясын сан ұлт пен ұлысты бір шаңырақтың астына біріктірген Достық үйімен, ондағы корей этномәдени бірлестігінің тыныс-тіршілігімен таныстырды.
Бұдан әрі жүздесу дөңгелек үстел шеңберінде жалғасып, Ким мырза ақтөбелік кәрістермен емін-еркін түрде сұқбаттасты.
«Алдымен тағдырдың жазуымен қасиетті қазақ жеріне жер аударылған ата-бабаларымызды сыртқа теппей, құшағын кең жайып қарсы алған қазақ бауырларыма алғыс айтамын. Бүгінде Қазақстандағы корей этносының өкілдері тату-тәтті, бейбіт күн кешіп жатыр. Мұның барлығы тәуелсіз елде барлық ұлттың мүддесін тең ұстап, Қазақстан халқы Ассамблеясы деген теңдессіз бірлестікті құрған ҚР Тұңғыш Президенті-Елбасы Н. Назарбаевтың сүбелі еңбегі деп білемін», - деп атап өтті Елші.
Өз кезегінде «Қоғамдық келісім» КММ директоры Н. Ағниязов Кореяның Қазақстандағы Өкілетті Елшісіне қазақтың ұлттық домбырасы бейнеленген қолөнер туындыны сыйға тартып, алғысын білдірді.
Одан әрі кездесу облыстық корей ЭМБ-нің шығармашылық ұжымы дайындаған концерттік бағдарламамен жалғасты.
Қысқа да нұсқа. Жазылыңыз telegram - ға