Көлік шинасының ені қандай болуы керек: бес негізгі талап
Көлік жүргізушілері арасында шинаның еніне қатысты сұрақ жиі талқыланады. Себебі біреулер оның кең болғаны дұрыс деп санайды. Сонымен қатар «дискіні қалай дұрыс таңдау керек?» деген сауал да өзекті. Ендеше соларға жауап іздеп көрейік.
Шинаның ені оның бүйіріндегі ХХХ/ХХ RХХ форматындағы белгілеудің алғашқы үш цифры арқылы көрсетіледі. Мәселен, 185/65 R16 өлшеміндегі шинаның ені – 185 миллиметр. Techinsider мәліметінше, бұл көрсеткіш кейбір жүргізушілер үшін өте маңызды, себебі кең шина темір тұлпарды спорттық көлікке айналдырғандай көрініс береді.
Сөйте тұра сарапшылар бұл параметр маңызды болғанымен, ол туралы қалыптасқан пікірлердің бәрі бірдей шындыққа жанаса бермейді деп отыр.
Шина тар болуы мүмкін бе?
Кейде жүргізушілер сатып алған шинасының ені көрсетілгеннен тар көрінеді деп шағымданады. Бірақ іс жүзінде шина ені протектор арқылы емес, толық үрленген кездегі бүйір қабырғаларының ең кең нүктелері арасындағы қашықтықпен өлшенеді. Егер айырмашылық бірнеше миллиметр болса – бұл қалыпты жағдай.
Бұған диск енінің әртүрлі болуы себеп. Ол шинаның бүйірін аздап қысып немесе, керісінше, керіп жібереді. Соған байланысты протектордың нақты ені көзге өзгеше көрінуі мүмкін.
Шина мен диск ені сәйкес келмесе, не істеу керек?
Автосарапшы, «Колеса Даром» компаниясының сервистік қызметтерін дамыту жөніндегі жетекшісі Адель Нургалиевтің сөзінше, бұл – жиі кездесетін жағдай. Тіпті іс жүзінде шина мен диск ені дәлме-дәл сәйкес келуі сирек болады.
Бұл қалыпты құбылыс. Себебі шина ені миллиметрмен, ал диск ені дюйммен өлшенеді. Оның үстіне, бұл көрсеткіштер әртүрлі нүктелерде өлшенеді. Сондықтан бұл аралық белгілі бір деңгейде өзгеріп отыруы мүмкін, – дейді Адель Нургалиев.
Жалпы алғанда, бір шина үшін диск ені 0,5-1 дюйм аралығында ауытқуы мүмкін. Бірақ шектен тыс айырмашылық болмағаны жөн, ең дұрысы, өндіруші көрсеткен параметрлерге барынша жақын нұсқаны таңдау керек.
Қате таңдалса не болады?
Егер шина мен диск ені сәйкес келмесе, бұл көлік жүргізу сапасына әсер етеді:
Шина дискке қарағанда тым кең болса, бүйірлері қысылады. Бұл басқаруды қиындатып, көліктің жолда «жүзуіне» әкеледі. Сонымен қатар протектордың шеттері тез тозады.
Ал диск тым кең болса, шина «үйшік» тәрізді орналасады. Бұл жүрісті қатайтып, соққыны күшейтеді және диск зақымдану қаупін арттырады.
Шина кең болуы керек пе, әлде тар болуы керек пе?
Бұл жерде басты ереже – көлік өндірушісі көрсеткен диапазоннан шықпау.
Осы шектеудің ішінде таңдау жасауға болады:
Кең шиналар:
Артықшылықтары – жолда жақсы жүруі, бұрылыста тұрақтылық және қысқа тежеу жолы.
Кемшіліктері – аквапланинг қаупі жоғары, жанармай шығыны көп, бағасы қымбат.
Тар шиналар:
Артықшылықтары – су мен лайда тұрақты, жанармайды үнемдейді, жүрісі жұмсақ.
Кемшіліктері – тежеу жолы ұзарады, бұрылыста көлік көбірек еңкейеді.
Сарапшы маусымдық таңдауға да назар аударады:
Жазда және трассада белсенді жүргізу кезінде сәл кеңірек шиналарды таңдауға болады, ал қыста – қар мен лайда жақсы жүру үшін тарлау шиналар тиімді, – дейді Адель Нургалиев.
Оқи отырыңыз 
