Иран Израильді зымыранмен атқылады: Қазіргі ахуал қандай?
The Jerusalem Post газеті Иран Израиль аумағына шамамен 180 зымыран атқылағанын мәлімдеді. Израильдің барлық аумағында әуе дабылы жарияланды, деп хабарлайды El.kz ақпарат агенттігі.
Сейсенбі кешінде Иран Израильге жаппай зымырандық соққы жасады. Салдары туралы ақпарат нақтылануда. Тегеран бұл әрекетті «Хезболла» мен ХАМАС топтарының жетекшілерінің қазасына жауап ретінде жасағанын мәлімдеді.
Әлеуметтік желілерде Иранда ұшырылып жатқан, Иордания аспанында ұшып бара жатқан және Израильде атып түсіріліп немесе құлап жатқан зымырандардың көптеген видеолары пайда болды.
Жергілікті уақыт бойынша кешкі сағат 8:30-да Израиль армиясы қауіпті жағдайдың аяқталғанын және бомба паналарынан шығуға болатынын хабарлады.
Алдын ала есептеулер бойынша, израильдік әскери сарапшылар Иран шамамен 180 зымыран ұшырғанын анықтады.
Израиль Қорғаныс армиясының баспасөз хатшысы, контр-адмирал Даниэль Хагари соққыдан кейін өткен брифингте әзірге құрбандар туралы мәліметтердің жоқ екенін айтты. Хагаридің айтуынша, әуе шабуылы кезінде зымырандар Израильдің орталығы мен оңтүстігіне бірнеше рет тиген.
Израиль армиясының баспасөз хатшысы бұл шабуылдың «салдары болатынын» мәлімдеді, бірақ Израильдің нақты не істейтінін және қашан әрекет ететінін ашып айтудан бас тартты.
Jerusalem Post газеті құтқару ұйымы Magen David Adom-ның басшысына сілтеме жасап, Тель-Авивтің солтүстігіндегі ғимаратқа тура зымыран тигенін және Израильдің бірнеше басқа аймақтарында зымырандардың құлағанын хабарлады.
Израильдің Haaretz газеті Иерусалим мен Тель-Авивте қатты жарылыстар естілгенін және орталық Израиль мен оңтүстікте, Негев шөлінде зымырандардың тигенін жазып жатыр, бірақ әзірге егжей-тегжейлі мәлімет берілген жоқ.
АҚШ президенті әкімшілігі президент Джо Байденнің америкалық әскерилерге Израильге соққыны қайтаруға көмектесуге бұйрық бергенін мәлімдеді. АҚШ пен басқа одақтастар Израильге осы жылдың 13 сәуірінде Иранның жаппай шабуылын тойтаруда да көмектескен болатын.
Иранның мәлімдемесі
Иранның Ислам революциясы сақшылары корпусы бұл зымырандық соққының өткен аптада Израильдің Бейрутке жасаған шабуылы кезінде "Хезболла" көшбасшысы Хасан Насралланың қазасына, сондай-ақ Тегеранда болған жарылыстан ХАМАС көшбасшысы Исмаил Ханияның өліміне жауап ретінде жасалғанын мәлімдеді. Иран бұл үшін де Израильді айыптауда.
Исмаил Ханияның, Хасан Насралланың және Аббас Нилфурушанның шейіт болуына жауап ретінде біз сионистер басып алған жерлердің қақ жүрегіне соққы жасадық, – деп әлеуметтік желілерде КСИР мәлімдемесі жарияланды.
Иранның Жоғарғы көшбасшысы аятолла Әли Хаменеи иврит тіліндегі твитінде Израильге қарсы жаңа және одан да күшті соққылар беруге уәде етті.
Reuters агенттігіне есімін атамаған ирандық шенеунік зымырандарды ұшыру туралы бұйрықты Жоғарғы көшбасшының өзі бергенін айтты. Агенттік сұхбаттасушысының айтуынша, аятолла Әли Хаменеи қауіпсіз жерде.
Иран президенті Масуд Пезешкиан да X желісінде, бұрынғы Твиттерде, мәлімдеме жасады. Ол бұл соққының мақсаты Израильге Иранның қақтығысқа түскісі келмейтінін, бірақ өз мүдделері мен азаматтарын қорғауға дайын екенін көрсету екенін жазды.
Пезешкиан бұл соққымен Иран өзінің мүмкіндіктерінің тек бір бөлігін көрсеткенін айтып, «Иранмен қақтығысқа түспеңдер!» деп ескерту жасады.
Қысқа да нұсқа. Жазылыңыз telegram - ға