Елімізде киберқылмыспен күрес жолға қойылған. Жауапты департамент интернет-алаяқтардың шырмауына түспеу үшін не істеу керегін жиі ескертеді. Киберқылмыспен күрес департаментінің мәліметінше, биыл 6 мыңнан астам дерек тергеліп, 1700 адам қылмыстық жауапкершілікке тартылған.
Киберқылмыспен күрес департаменті басшысының орынбасары Әлібек Оразалының айтуынша, биыл қаңтар-наурыз аралығында 477 адам жауапқа тартылды. Мұндай нәтижеге жету үшін тек ішкі істер органы емес, өзге де уәкілетті құрылымдар, IT саласының мамандары мен бұқаралық ақпарат құралдарының өкілдері бірлесіп жұмыс істеп жатыр.
Сондай-ақ Бас прокуратураның Құқықтық статистика және арнайы есепке алу комитетінің мәліметінше, биыл бірінші тоқсанда келтірілген шығын көлемі 4,8 млрд теңгеге жеткен. Оның 2,4 млрд теңгесі жәбірленушілерге қайтарылған. Жалпы, 2025 жылы интернет алаяқтар елге 12,2 млрд шығын келтірді. Одан 5 млрд теңге көлемінде қаражат қайтарылды.
