Халықаралық «Silk Way Star» байқауының 12 қатысушысы Астанаға келді
Ақмарал Ағзамқызы El.kz тілшісі
Астана халықаралық телевизиялық «Silk Way Star» мега-жобасының жұлдыздарын қарсы алды, деп хабарлайды El.kz интернет порталы.
Елордаға байқауға қатысатын өнерпаздардың барлығы да келіп жетті. Алғашқылардың бірі болып Қытай елінің өкілі табан тіресе, бірнеше сағат бұрын Малайзиядан келген қатысушыны қарсы алу рәсімі өтті. Енді қатысушылар толық құрамда, ал үлкен шоуға дайындық қызу жүріп жатыр.
Күн тәртібі минуттап белгіленген: кәсіби музыкалық бэндпен дайындықтар, сахналық киімдерді киіп көру, хореография мен вокалдық партияларды пысықтау. Ал ұйымдастырушылар құпияны сақтап отыр. Қатысушылар бір-бірінің репертуарымен таныс емес. Мұның барлығы өнерпаздардың сахнадағы алғашқы өнер көрсету сәтін нағыз сенсацияға айналдыру үшін жасалған.
Байқау барысында қазақ мәдениетіне де ерекше назар аударылмақ: өнерпаздар қазақ тіліндегі әндерді орындауға дайындалып жатыр. Бұл – еліміздің бай мұрасын құрметтеудің ғана емес, жобадағы ұлттық мәдениеттердің сан алуандығын көрсетудің де айқын белгісі.
Күн жоспарының тығыздығына қарамастан, қатысушылардың көңіл-күйі көтеріңкі. Олар елорданың қонақжайлығын атап өтіп, бос уақыт табылса, Астананың көрікті жерлерімен танысуды жоспарлап отыр.
«Silk Way Star» байқауы әрбір қатысушы үшін жай ғана сахналық жарыс емес. Бұл – өзін әлемдік деңгейде танытуға, туған елін абыроймен таныстыруға берілген мүмкіндік. Алда ең қызу дайындық күндері тұр, сондықтан өнерпаздар жүз пайыз күш-жігерін жұмсап, көрерменге Ұлы Жібек жолының қайталанбас ерекше музыка өнерін паш етпек.
«Silk Way Star» алғашқы халықаралық музыкалық байқауының қатысушылары:
Чжан Хэ Сюань (Қытай)
Тамга (Қырғызстан)
Язмин Азиз (Малайзия)
Мишель Джозеф (Моңғолия)
«Kandis» тобы (Оңтүстік Корея)
Фахриддин Хакимов (Тәжікстан)
Автандил Абесламидзе (Грузия)
Саро Геворгян (Армения)
Довран Шаммыев (Түрікменстан)
Мадинабону Адылова (Өзбекстан)
Сабина Заде (Әзербайжан)
Alem (Қазақстан)
Қысқа да нұсқа. Жазылыңыз telegram - ға
Оқи отырыңыз 
