Google киімді фото арқылы виртуалды кие алатын құрал ұсынды
Google I/O 2025 конференциясында компания онлайн саудаға арналған AI Mode деп аталатын жаңа мүмкіндіктер жиынтығын таныстырды. Бұл жаңартулар жасанды интеллект негізінде киім таңдауды, жарасымдылығын тексеруді және сатып алу процесін барынша оңайлатуға бағытталған. Қазіргі таңда бұл функциялар АҚШ-тағы Search Labs пайдаланушыларына сынақ режимінде қолжетімді, ал толық іске қосылуы алдағы бірнеше айда жоспарланып отыр.
1. Жаңа өнімді табу – визуалды әрі жеке бағытта
Google-дың AI Mode жүйесінде пайдаланушының іздеу сұранысына Gemini моделі жауап береді. Егер сіз, мысалы, “саяхатқа арналған сөмке” немесе “бөлмемдегі жиһазбен үйлесетін кілем” деп іздесеңіз, ЖИ бұл сұраныстың визуалды екенін түсініп, суретке толы жаңа панель ұсынады.
Бұл панель әдеттегі Google Image іздеулеріне ұқсас болғанымен, бетінің оң жағында орналасып, төрт бағаннан тұратын тік көріністе ұсынылады. Мұнда компаниялар өз тауарларын ақылы түрде жоғарғы қатарға шығара алады.
Сіз сұранысты нақтылаған сайын (мысалы, “Астананың жаңбырлы ауа райына шыдайтын сөмке керек”), ЖИ сәйкес келетін өнімдерді анықтап, динамикалық түрде суреттерді жаңартып отырады.
2. Бір фото жүктеп, өзіңізге жарасатын киімді көре аласыз
AI Mode жаңартуларындағы ең ерекше функция – виртуалды киіп көру (try-on) жүйесінің жетілдірілуі. Бұған дейін қолданушылар өзіне ұқсас модельді таңдап, соған киімді "кигізетін" еді. Енді бұл процес біршама жекешелендірілді.
Google мәлімдегендей, жақында пайдаланушылар тек бір фотосын жүктеу арқылы өз бейнесінде киімді көре алатын болады. Сән бағытына арнайы бейімделген жаңа генеративті ЖИ моделі адамның дене пішінін, мата түрлерінің бүктелуін, созылуын және түсіп тұруын реалистік түрде өңдей алады.
Бұл жүйе бүкіл Shopping Graph мәліметтер базасындағы миллиардтаған киімді қолдайды және пайдаланушы фото-поза мен дене пішін ерекшеліктеріне сай бейімделген визуализация ұсынады. Жүйені сынап көру үшін Search Labs ішінен “try it on” белгішесін бар өнімнен іздеу жеткілікті.
3. Бағаны бақылау және “мен үшін сатып ал” функциясы
Киім немесе тауар таңдалып қойғанымен, оны бірден сатып алуға бәрінің дайын бола бермейтіні рас. Осы жағдайға орай Google жаңа “агенттік төлем” мүмкіндігін іске қосуда.
Пайдаланушы өнімді таңдаған кезде, оның бағасын бақылау үшін арнайы батырма пайда болады. Бұл – Google Flights-те бұрыннан бар “баға түсімін бақылау” жүйесіне ұқсас. Жаңа нұсқада сіз қалаған баға, өлшем, түс секілді параметрлерді енгізе аласыз. Сол шарттар орындалғанда Google сізге хабар береді.
Егер сіз “сатып алуға дайынмын” десеңіз, “buy for me” батырмасын басу арқылы Google сіздің атыңыздан сауда жасайды.
Компанияның түсіндіруінше, “бұл функция тауарды сауда сайтына себетке салып, Google Pay арқылы қауіпсіз түрде төлем жасап береді.”
Google ұсынған AI Mode – онлайн сауданы түбегейлі өзгертуге бағытталған қадам. Жасанды интеллект арқылы:
қажетті өнімді тез табуға,
өз бейнеңізде жарасымдылығын көруге,
сатып алу процесін автоматтандыруға болады.
Бұл функциялар алғашқы кезеңде АҚШ-та іске қосылады, алайда болашақта ғаламдық пайдаланушылар үшін де қолжетімді болатыны күтілуде. Бір ғана фотомен бүкіл гардеробты көру – сауданың болашағы бүгін басталды деуге болады.
Бұл технология сән индустриясында тұтынушыға бейімделген жеке тәжірибе ұсынудың жаңа кезеңін ашады. Бутик немесе онлайн дүкендер енді "бұл саған жарасады ма?" деген сұрақты ЖИ арқылы бірден көрсете алады. Бұл – сатып алушыға сенімділік, сатушыға – конверсия.
Мұндай шешімдер әсіресе қашықтан сауда жасаушылар, дене пішіні стандартты емес тұтынушылар, немесе қымбат киім алғанға дейін жақсылап көргісі келетіндер үшін таптырмас мүмкіндік.
AI Mode арқылы Google жай ғана іздеу жүйесі емес, сауда кеңесшісі, виртуалды киім ілгіші, және сенімді көмекшіге айналып отыр.
Қысқа да нұсқа. Жазылыңыз telegram - ға
Оқи отырыңыз 
