Еуразия университетінің студенттері заманауи жатақханаға орналаса бастады (ФОТО)

Л.Н. Гумилев атындағы Еуразия ұлттық университетінің студенттері үшін қуанышты жаңалық - 2656 орынға арналған жаңа студенттер үйі пайдалануға берілді. Бұл жатақхана тек баспана ғана емес, студенттердің білім алуына, шығармашылықпен айналысуына және жайлы өмір сүруіне арналған заманауи орталық болмақ. Бүгіннен бастап білім алушылар жаңа студенттер үйіне орналасып жатыр. Осы сәтті пайдаланып, білімді жастарға арналған жаңа жатақхананың тыныс-тіршілігімен танысып қайттық.

2025 жыл елордалық студенттер үшін ерекше басталды. Президент Қасым-Жомарт Тоқаев ЕҰУ студенттеріне арналған жаңа жатақхананы аралап, жүргізіліп жатқан жұмыстарды оң бағалады.

Фото: El.kz/Арман МУХАТОВ

Жатақхана үш блоктан тұрады. Әр блокта коворкинг-зоналар, заманауи жабдықталған кітапханалар, спорт және демалыс аймақтары орналасқан. Бірнеше қабатты қамтитын бұл ғимаратта студенттер бос уақыттарын тиімді өткізе алады. Мұнда оқу залдары мен интернетке еркін қосылу мүмкіндігі бар, ал демалыс аймақтары бос уақытты тиімді өткізуге қолайлы. Л. Н. Гумилев атындағы Студенттер үйлері дирекциясының директоры Азамат Жұматаев студенттер үйінің ерекшеліктерін атап өтті.

Фото: El.kz/Арман МУХАТОВ

Л. Н. Гумилев атындағы Еуразия ұлттық университетінің жаңадан ашылған студенттер үйі 2600-ден астам орынға арналған. Бүгінгі күннен бастап біз студенттерді орналастыру жұмыстарын жүргізіп жатырмыз. Бұл жатақханада университеттің барлық курсының студенттері орналасады және оған қоса арнайы магистранттар мен докторанттарға арналған бөлмелеріміз бар. Жатақхананың басты ерекшелігі – білім алушылардың еркін білім алып, біліммен, ғылыммен айналысуға арналған қоғамдық орындары мен коворкинг орталықтары жасақталған. Ас бөлмелері заман талабына сай жиһаздармен жабдықталып, бөлмелерде студенттерге қажетті дүниелер толықтай қамтылған. Бұл жерде мүмкіндігі шектеулі студенттерге арналған арнайы бөлмелеріміз бар. Коляскамен жүретін немесе жүріп-тұруында кедергісі бар студенттеріміз еркін қозғала алады. Лифтпен қозғалыс та ешқандай қиындық тудырмайды, - дейді Л. Н. Гумилев атындағы Студенттер үйлері дирекциясының директоры Азамат Жұматаев.

Фото: El.kz/Арман МУХАТОВ

Ерекше қажеттіліктері бар студенттерге қолайлы жағдай

Жатақхана құрылысы барысында ерекше қажеттіліктері бар студенттердің талаптары жан-жақты ескерілген. Барлық қабаттар мен бөлмелерде кедергісіз қозғалыс үшін арнайы пандустар мен лифтілер орнатылған. Бұл — университеттің инклюзивті білім беру саясатының тағы бір айқын көрінісі.

Фото: El.kz/Арман МУХАТОВ

Заманауи инфрақұрылым

Студенттер үйі оқу мен өмір сүруді барынша ыңғайлы ету мақсатында жабдықталған. Әр блокта:

• Коворкинг-зоналар — топтық жұмысқа арналған ашық кеңістіктер;
• Кітапханалар — білімге қолжетімділікті арттыратын оқу орындары;
• Спорт алаңдары — студенттердің дене шынықтыруымен айналысуына мүмкіндік береді;

Фото: El.kz/Арман МУХАТОВ

Студенттерді жатақханамен қамтамасыз ету қалай жүріп жатыр

Ғылым және жоғары білім министрлігінің дерегінше, елімізде студенттерді жатақханамен қамтамасыз ету бағытында ауқымды жұмыстар атқарылып жатыр. Былтыр 11 079 орындық 40 жаңа жатақхана іске қосылса, биыл Астана қаласында тағы 3400 орындық жеті жатақхана ашылады. Ал 2025 жылға қарай ЕҰУ-де студенттерге арналған орын саны 10 000-ға жеткізілмек. Әр жыл сайын 2029 жылға дейін студент жастарға арналған жатақханаларда 10 мың орын пайдалануға беріледі.

Фото: El.kz/Арман МУХАТОВ

Жатақхананың бір айлық ақысы 30 мың теңге. Өз талаптары бар. Бірден орналасқанда 3 айлық ақысын төлеу керек. Егер орын болған жағдайда кез келген ниет білдірген студент орналаса алады. Ал биылғы оқу жылында басқа жатақханада тұрып жатқан студенттер жылды сол жақта аяқтайды. Жатақханада тұрмайтын студенттердің барлығын орналастырып жатырмыз. Мұғалімдер бұл жатақханада орналаспайды. Бұл Қаржы орталығымен келісімшарт негізінде жүзеге асып жатқан жатақханада болғандықтан тек студенттер қамтылады. Бұл жерде университетке ешқандай қаржы түспейді. Қаржы серіктес компанияға түседі. Қыркүйек айында мемлекеттік-жекеменшік әріптестік негізінде 400 адамдық жатақхана берілген болатын. Бұл осындай әріптестік негізде пайдалануға берілген екінші студенттер үйі. Қазіргі таңда тағы екі жатақхананың құрылысы басталып жатыр. 400 орындық 2 жатақхана пайдалануға беріледі, - дейді Л. Н. Гумилев атындағы Студенттер үйлері дирекциясының директоры Азамат Жұматаев.

Фото: El.kz/Арман МУХАТОВ

Университетке қарасты 7 жатақханамыз бар. Бұл жатақханаларда студенттерге қолайлы болу үшін жөндеу жұмыстары, жиһаздарын ауыстыру жұмыстары жоспар бойынша жүзеге асып жатыр. Адам саны бөлменің шаршы метріне байланысты жүйеге келтіріп жатырмыз. Жаңа жатақханалардың ашылуынан соң ескі студенттер үйіндегі адам саны азайып жатыр, - дейді Азамат Жұматаев.

Фото: El.kz/Арман МУХАТОВ

Жатақхана мәселесі бүкіл еліміз бойынша үлкен проблема. Жатақхана жеткіліксіз мәселесі жекеменшік-әріптестік негізде бірнеше жаңа жатақханалар ашылып жатыр. Соңғы ашылған осы студенттер үйінің арқасында біз жатақхана тапшылығы мәселесін 100 пайызға шештік, - дейді ол.

Фото: El.kz/Арман МУХАТОВ

Жатақханадағы өмір студенттік жылдардағы маңызды кезең екені анық. Бұл жерде студенттер өздеріне жаңа дос, жаңа орта тауып, өмірдің тағы бір кезеңіне қадам басады. Жатақханаларда студенттердің шығармашылығы мен спортпен айналысуына мүмкіндік көп. Әр жатақханада қоғамдық жұмыстармен айналысатын орта – студенттік кеңестер жұмыс істейді. Университет тарапынан педагог, психолог мамандар жұмыс істейді. Студенттердің барлық қалауы орындалып жатыр, - деп толықтырды Студенттер үйлері дирекциясының директоры Азамат Жұматаев.

Фото: El.kz/Арман МУХАТОВ

Жатақханаға алғаш болып қоныстанған студенттер жаңа үйдің жайлылығы мен заманауи жабдықталуын ерекше атап өтті.

Біз Қ. Жұбанов атындағы Ақтөбе өңірлік университетінен ЕҰУ-ға академиялық ұтқырлық бағдарламасы бойынша келіп жатырмыз. Филология факультетінің Қазақ тілі мен әдебиеті мамандығы бойынша 2-курста білім аламыз. Бізге осындай жаңа жатақханадан орын бұйырғанына қуаныштымыз. Бұл жатақхана тек жайлы баспана ғана емес, нағыз студенттік өмірдің орталығы. Мұнда оқу үшін барлық жағдай жасалған, - дейді Ақгүл Көптілеуова.

Фото: El.kz/Арман МУХАТОВ

Жаңа студенттер үйінің ашылуы Л.Н. Гумилев атындағы ЕҰУ-дің студенттеріне үлкен қолдау болмақ. Заманауи инфрақұрылым, жайлы орта және барлық қажеттіліктердің қамтылуы оқу үдерісін жеңілдетіп, студенттердің сапалы білім алуына мүмкіндік береді. Бұл жатақхана ЕҰУ студенттік өмірінің жаңа кезеңін бастап берді.

Фото: El.kz/Арман МУХАТОВ

Қысқа да нұсқа. Жазылыңыз telegram - ға