Ермек Маржықпаев Президентке Көкшетаудағы ЖЭО құрылысы туралы баяндады
Бұл туралы Ақорданың баспасөз қызметі мәлім етті
Мемлекет басшысы Ақмола облысының әкімі Ермек Маржықпаевты қабылдады, деп хабарлайды El.kz ақпараттық агенттігі.
Президентке Ақмола облысының 2022 жылғы әлеуметтік-экономикалық даму қорытындылары туралы есеп берілді.
Ермек Маржықпаевтың айтуынша, өңір экономикасының бірқатар саласында өсім қарқыны байқалады. Атап айтқанда, мемлекеттік қолдау шараларының нәтижесінде ауыл шаруашылығы саласындағы жалпы өнім көлемі алғаш рет 1 триллион тенгеден асады. Өнеркәсіп өнімін өндіру көлемі шамамен 1,4 триллион тенгені құрады. Негізгі капиталға құйылатын инвестиция өсімі сақталып отыр. Экономиканың барлық саласында 22 мыңнан астам жаңа жұмыс орны, соның ішінде 16 мың тұрақты жұмыс орны ашылды.
Сонымен қатар Президентке жылыту маусымының барысы, Көкшетау қаласындағы жылу электр орталығының құрылысы, бірқатар инфрақұрылымдық жобаның жүзеге асырылуы, елорда маңындағы аймақтардың дамуы, сондай-ақ туризм саласын ілгерілету жұмыстары туралы баяндалды.
Кездесу соңында Мемлекет басшысы облыстың әлеуметтік-экономикалық көрсеткіштерін одан әрі жақсарту және өңір тұрғындарының әл-ауқатын арттыру жөнінде бірқатар тапсырма берді.
Қысқа да нұсқа. Жазылыңыз telegram - ға