Елордада конкурдан ашық біріншілік өтіп жатыр

Астанада Республика күні қарсаңында ат спортының конкур түрінен 50-ге жуық шабандоз бақ сынаған ашық біріншілік өтіп жатыр. Оған, Астана, Қарағанды, Алматы қаларынан келген шабандоздар белгілі бір тәртіппен, белгілі бір күрделілік пен биіктіктегі кедергілерді еңсеру арқылы бақтарын сынап жатыр, деп хабарлайды El.kz

- Астана іргесіндегі «Этноауыл» ұлттық-мәдени кешенінің аумағында  «Арғымақ» ат - сауықтыру спорт кешенінің ашылуына және Республика күніне арналған ат спортының конкур түрінен бірінші күнгі жарыс бастау алды. Алғашқы күні ашық біріншіліктің іріктеу сынына 50-ге жуық сәйгүлік қатысуда. Олимпиадалық тәртіпте шабандоздар үш түрлі санатта бақтарын сынайды: - «Ашық сынып санаты», «Жас жылқылар санаты гандикап» және «Балалар санаты».  Біріншіге 12 жастан 15 жасқа дейінгі (қоса алғанда) балалар ал, екінші мен үшінші санаттар бойынша 16 жастан асқан шабандоздар қатысады. Конкур ат жарысы ат спортының ішінде ең әсерлісі, қызығы және бейнелісі болып табылады.Бұл жарыста спортшы мен жылқының әртүрлі жағдайда және кездескен кедергілерден бағыт бойынша жүріп өткен жолы сыналады. Төрешілер жолдың жылдамдығы мен тазалығына мән береді. Әрбір құлаған кедергі үшін айыппұл секундтары бар. Жарыстың жалпы жүлде қоры шамамен 7 миллион теңгені құрайды. Барша елордалықтарды,  көрермен қауымды бізбен бірге жанкүйер болуға шақырамыз, - дейді ат спортының олимпиадалық түрлерінен мемлекеттік жаттықтырушы Аманжол Хасенов. 

Спорт мамандарының айтуынша, конкур спорты олимпиада ойындары мен халықаралық əлемдік жарыстарда жанкүйерлері көп əрі өнердің шыңын бағындыратын спорт түрі болып саналады. 

- «Менің есімім - Ника. Менің ат спортымен айналысқаныма үш жылдан асты. Қарағанды қаласынан келдім. Бүгінгі жарыс өте қызықты және тартысты өтеді деп ойлаймын. Бүгін мен 120 см биіктіктегі кедергілер бойынша жарыс жолына шығамын. Қатысушылар өте көп. Арасында ең мықтылары  да бар. Жаңадан ашылып жатқан ипподром өте әдемі. Іші жарыс өткізуге сай.  Аттар тұратын қоралар да бар. Өзіме қатты ұнады. Бұл ипподромда бірнеше республикалық, халықаралық жарыстың бастамасы болады деп үміттенемін» - дейді Қарағанды қаласынан келген қатысушы Сим Ника.

Айта кетейік, 25 қазан яғни, ертең жарыстың соңғы финал ойындары мен «Арғымақ» ат-сауықтыру спорт кешенінің ресми ашылу салтанаты өтеді. Спорт кешеннің ресми ашылуы сағат 11:00-ге жоспарланған. Жарыстың басты мақсаты – ұлттық және олимпиадалық спорт түрлерін кеңінен насихаттау, келешегі зор шабандоздар мен жылқыларды анықтау. Сондай ақ, мерекелік шара аясында елорда тұрғындары үшін киіз үй тігіліп, көркем өнерпаздар ән мен күйден шашу шашып, концерттік бағдарлама ұсынады дейді ұйымдастырушылар. 

Қысқа да нұсқа. Жазылыңыз telegram - ға