Еліміз жауынгерлері көш басында
Армян елінің Дилижан полигонындағы «Бейбітшілік жауынгерінде» «Эрудит» зияткерлік кезеңі аяқталды.Армян елінің Дилижан полигонындағы «Бейбітшілік жауынгерінде» «Эрудит» зияткерлік кезеңі аяқталды.
Еліміздің үш полигонында, Әзербайжанға қарайтын су аумағында, армянның Дилижанында, Кабардино-Балкария мен Мәскеу облысында қазақстандық жауынгерлер Халықаралық армия ойындарына қатысып, жақсы нәтижелер көрсетуде, деп хабарлайды EL.KZ.
Қорғаныс министрлігінің мәліметіне қарағанда, Қарағанды облысында өтіп жатқан «Тактикалық мерген» байқауының кезекті кезеңінде Қазақстан командасы жеңіске жетті.
Екі жауынгер жарысында әскери қызметшілер тосқауылға түскен кездегі тактикалық және атыс тапсырмаларын орындады. Қатысушылар қалқалана отырып жылжып, нысанаға оқ жаудырды. Қазақстандық жауынгерлердің нәтижелі әрекеттері байқаудың соңғы кезеңінде оларды жеңіске жеткізді. Екінші орында – Ресей әскери қызметшілері, үшінші орында – Қытай.
Әзербайжан Республикасының Пута әскери-теңіз базасы аумағындағы теңіз полигонында су үсті кемелері экипаждарының «Теңіз кубогы» атты сайысы жалғасуда. Әскери теңізшілер әуе нысанасына артиллериядан оқ атты. Бұл тапсырманы жарыстың барлық қатысушылары сәтті орындап, 45 ұпайдан жинады. Үш жаттығудың қорытындысы бойынша қазақстандық теңізшілер 132 ұпай санымен екінші орында. Бірінші орынды теңдей 135 ұпай жинаған Әзербайжан мен Ресей кемелерінің экипаждары өзара бөлісті.
Кабардино-Балкариядағы «Терскол» тау дайындығы және аман қалу оқу-жаттығу орталығында өтіп жатқан «Эльбрус шеңбері» байқауында әскери қызметшілер таудағы кедергілерден өтіп, топ құрамында атыс жаттығуын орындады. Жарыстың алты арнайы тапсырмасын орындағаннан кейін Қазақстан командасы бәсекелестерінен сәл артта қалып, төртінші орынға табан тіреді. Бірінші орынды – Ресей, екінші орынды – Өзбекстан, үшінші орынды – Қытай альпинистері иеленді. Алда жауынгерлерге таудағы аса күрделі деген жарыс кезеңі өткізіледі, нәтижесіне сәйкес байқаудың жеңімпаздары мен жүлдегерлері анықталады.
Армян елінің Дилижан полигонындағы «Бейбітшілік жауынгерінде» «Эрудит» зияткерлік кезеңі аяқталды. Әскери тарихты, географияны, халықаралық гуманитарлық құқықты, әлемдік өнер мен әдебиетті білуге арналған жарыста қазақстандық жауынгерлер Ресей мен Беларусь әскери қызметшілерінен кейінгі үшінші орынға тұрақтады. Алда шешуші жарыстар өтетін болады, сондықтан әлі қазақстандық команданың жеңіске жетуге деген мүмкіндігі бар.
Қысқа да нұсқа. Жазылыңыз telegram - ға