Елена Рыбакина қатысатын WTA Finals рекордтық сыйақымен өтеді
2025 жылғы WTA Finals әйелдер теннисінен қорытынды турнир екінші жыл қатарынан Эр-Риядта (Сауд Арабиясы) ұйымдастырылады. Турнир 1–8 қараша аралығында әлемнің үздік 8 теннисшісі мен 8 жұбы арасында өтеді, деп хабарлайды El.kz интернет порталы.
Биылғы жылды әлемдік рейтингте бірінші орынмен аяқтайтын Арина Соболенко қатысушылардың қатарында. Штеффи Граф тобына Арина Соболенко, Кори Гауфф, Джессика Пегула және Жасмин Паолини кірсе, Серена Уильямс тобына Ига Швёнтек, Аманда Анисимова, Елена Рыбакина және Мэдисон Киз кіреді.
Жұптық сайыста Мирра Андреева мен Диана Шнайдер дуэты алғаш рет өнер көрсетеді. Негізгі фавориттер қатарында Кудерметова – Мертенс, Синякова – Таунсенд және Олимпиада чемпионы дуэт Эррани – Паолини бар.
2025 жылғы WTA Finals турнирінің жалпы жүлде қоры рекордтық деңгейге жетіп, 15,5 миллион АҚШ долларын құрайды. Егер жеңімпаз топтық кезеңнен финалға дейін бірде-бір ойын жоғалтпай ойнайтын болса, ол 5,07 миллион доллар табысқа ие болады. Әр қатысушыға турнирге қатысқаны үшін кемінде 331 000 доллар төленеді.
Топтық кезеңдегі әр жеңіс үшін теннисшілер 396 500 доллар, жартылай финалда жеңіс 1,183 миллион доллар, финалдық жеңіс үшін 2,367 миллион доллар қосылады. Бұл 2024 жылғы сыйақымен салыстырғанда айтарлықтай жоғары: өткен жылы Коко Гауфф турнирді жеңіп, 2,5 миллион доллар алған, ал финалда Чжэн Циньвэнь жеңіліп, 1,27 миллион доллар алған.
Турнирлік ұпай жүйесі де маңызды. Әр топтық ойындағы жеңіс 200 рейтингтік ұпай береді, финалға шығу – қосымша 400 ұпай, ал финалда жеңіс – 900 ұпай. Жиынтықта бір қатысушы максимум 1 500 ұпайға ие бола алады. Бұл теннисшілер үшін әлемдік рейтингтегі орнын жақсартудың үлкен мүмкіндігі болып саналады.
Қысқа да нұсқа. Жазылыңыз telegram - ға
Оқи отырыңыз 
