Елдегі білім саласында жемқорлық тәуекелдерін жою мәселесі қолға алынды
Ведомствоаралық кеңесте сыбайлас жемқорлық тәуекелдеріне жүргізілген сыртқы талдау қорытындыланды, деп хабарлайды El.kz ақпараттық агенттігі оқу-ағарту министрлігіне сілтеме жасап.
Оған Президент Әкімшілігінің, Ұлттық банктің, Жоғары аудиторлық палатаның өкілдері, Парламент Мәжілісінің депутаттары, Сыбайлас жемқорлыққа қарсы іс-қимыл агенттігінің, Оқу-ағарту, Цифрлық даму және аэроғарыш өнеркәсібі, Қаржы, Денсаулық сақтау, Еңбек және әлеуметтік қорғау министрліктерінің, сондай-ақ, қоғам өкілдері қатысты.
Соңғы үш жылда мемлекет білім саласын дамытуға 12,1 триллион теңге бөлді.
«Педагог мәртебесі туралы» Заң қабылданып, мұғалімдердің жалақысы екі есеге, ал ғылыми дәрежесі мен сабақтан тыс қосымша жүктемелері болған жағдайда – үш есеге арттыруға мүмкіндік берілді. Әлеуметтік қолдау шараларына қарамастан, білім беру саласы ең көп жемқорланған салалардың бірі болып қалуда. Сыбайлас жемқорлық тәуекелдерінің болуын ескере отырып, Оқу-ағарту министрі білім беру саласы құқықтық нормаларды күшейту және үдерістерді цифрландыру тұрғысынан үнемі жетілдіруді қажет ететінін атап өтті.
Министрлік бухгалтерлік және кадрлық есепке алу жүйелерін Ұлттық білім беру деректер қорымен және қазынашылық жүйесімен интеграциялауды ұсынды. Бұл бюджет қаражатын аударуды бақылауды күшейтуге және қаражатты үшінші тұлғаларға аудару тәуекелдерін болдырмауға мүмкіндік береді.
Сондай-ақ, бюджеттік бағдарламалар әкімшілері тарапынан қаржылық тәртіпті күшейту және қаржылық мәдениетті қалыптастыру қажеттілігі туралы атап өту қажет, өйткені білім беру саласындағы әрбір қызметкер адамгершілікке, парасаттылыққа, патриотизмге ие болуы және балалар мен елдің әл-ауқаты оның әрбір іс-әрекетіне байланысты екенін түсінуі тиіс, - деді Ғани Бейсембаев.
Кеңес қорытындысы бойынша білім саласындағы сыбайлас жемқорлық тәуекелдерін жою бойынша ведомствоаралық «жол картасы» қабылданды.
Қысқа да нұсқа. Жазылыңыз telegram - ға