eGov-та мекенжайдың өзгергені туралы ақпаратты көрсететін жаңа сервис іске қосылды
Бұл туралы ҚР цифрлық даму, инновациялар және аэроғарыш өнеркәсібі министрі Бағдат Мусин Instagram-дағы парақшасында жазды
eGov.kz порталы және eGov mobile қосымшасында мекенжайдың өзгергені туралы ақпаратты көрсететін жаңа сервис іске қосылды, – деп хабарлайды El.kz.
Бұл туралы ҚР цифрлық даму, инновациялар және аэроғарыш өнеркәсібі министрі Бағдат Мусин Instagram-дағы парақшасында жазды.
– eGov.kz порталы және eGov mobile қосымшасында мекенжайдың өзгергені туралы ақпаратты көрсететін жаңа сервис іске қосылды, яғни жылжымайтын мүлік объектісі мекенжайының өзгеруі тарихын осы арқылы білуге болады. Әдетте мұндай мәселе жылжымайтын мүлікті сату немесе мүлік кепілін тіркеу кезінде туындайды. Сервистің көмегі қандай? Түсіндіре кетейін. Бәлкім, біреулердің жылжымайтын мүлікті сату кезінде тұрғылықты мекенжайының өзгергенін анықтап, ал ол мәліметтерді растау үшін Халыққа қызмет көрсету орталығына барып уақытын жоғалтып, әуре-сарсаңға түскен кездері болған шығар. Осылайша, жаңа сервис нотариустар мен банктерге өз клиенттерін ХҚКО-ға жібермей, осы деректерді тікелей алуға мүмкіндік береді» – делінген хабарламада.
Министрдің айтуынша, егер азаматтардың құжаттарының цифрлық нұсқасы болса, олардан түрлі анықтамаларды талап ету заң жүзінде тыйым салынады. Осылайша, қызмет көрсету уақыты қысқарып, жұмыс процесі жеделдетіледі. Аталған жаңашылдық Мемлекет басшысының мемлекеттік аппаратты бюрократиядан арылту саясатына негізделген.
Мәліметтерді білу және растау үшін мекенжайдың тіркеу кодын білу жеткілікті. Қажетті ақпарат eGov.kz порталында «Сервистер» бөлімінде және eGov mobilе қосымшасында «Жылжымайтын мүлік және ТКШ» бөлімінде қол жетімді болады. Осылайша жылжымайтын мүліктің мекенжайының өзгеру тарихы көрсетіледі.
Аталған сервис - мемлекеттік қызметтер комитетінің, мемлекеттік несие бюросының ақпараттық жүйелерін және бірыңғай нотариалдық ақпараттық жүйесін интеграциялау жолымен іске асырылды.
Қысқа да нұсқа. Жазылыңыз telegram - ға