Қазіргі заманда ұшақпен сапар шегу — көпшілік үшін қалыпты жағдай, деп хабарлайды El.kz интернет порталы.

Алайда ұшу кезінде адамның ағзасына едәуір жүктеме түсетіні жиі ескеріле бермейді. Атмосфералық қысымның күрт өзгеруі, оттегі жетіспеушілігі (гипоксия), сусыздану және ұзақ уақыт қозғалыссыз отыру – мұның бәрі кей адамдар үшін үлкен қатер төндіреді.

Кейбір сырқат түрлеріне шалдыққандарға мүлде тыйым салынуы мүмкін

Ресейлік жоғары санатты терапевт Екатерина Кашухтың айтуынша, кейбір дерт түрлеріне шалдыққан адамдар үшін әуе сапары қауіпті. Оның сөзінше, егер жолаушыда жедел отит (құлақтың қабынуы) болса, ұшу немесе қону кезінде қысым айырмасы салдарынан дабыл жарғағы жарылып, ортаңғы құлаққа қан кетуі мүмкін.

Жүрек-қантамыр аурулары – басты қауіп тобы

Дәрігер әсіресе декомпенсация сатысындағы гипертониясы бар адамдарға ұшуға болмайтынын ескертеді. Ұшу кезінде қан қысымы күрт көтеріліп, гипертониялық кризге, инсультке немесе жүрек талмасына әкелуі мүмкін.

Инфаркт пен инсульттен кейінгі кезең – аса әлсіз шақ

Медициналық нұсқаулар бойынша, миокард инфарктынан кейін 3–4 апта, ал ишемиялық инсульттен кейін кемінде екі ай бойы ұшақпен ұшуға болмайды. Себебі бұл кезеңде ағза оттегі тапшылығы мен күйзелістерге өте сезімтал келеді.

Ұшуға мүлде тыйым салынатын жағдайлар:

• өкпеқапішілік ауа жиналуы (пневмоторакс);
• ірі хирургиялық оталардан кейінгі алғашқы кезең;
• ішкі қан кету қаупі бар ауыр жарақаттар.

Сапар алдында міндетті кеңес керек

Созылмалы аурулары бар азаматтарға дәрігермен кеңесіп, қажет болған жағдайда ұшуға медициналық рұқсат алу ұсынылады. Бұл денсаулыққа төнуі мүмкін қауіптердің алдын алып, сапарды қауіпсіз етуге мүмкіндік береді.