Жыл үздіктері марапатталды

Астанадағы Қазақ Ұлттық өнер университетінің про­фессоры, Домбыра кафед­расының меңгерушісі, күйші Жанғали Жүзбаев Мемлекеттік хатшы Мұхтар Құл-Мұхам­медтің қолынан «Қазақстан Республикасының еңбек сі­ңірген қайраткері» құрметті атағын алды.
Арқа, Қаратау күйлерін кө­зінің қарашығындай қорғап, жинап, насихаттаушы, шертпе күйдің шебері Жанғали Жүзбаев өткен жылы ердің жасы елуге толған болатын. «Атақ деген де ажал сияқты. Біреуге ерте, бі­реуге кеш келеді деген екен Шәмші Қалдаяқов. Сол кісі айтпақшы, мен де шәкіртте­ріммен бірге атақ алып жа­тыр­мын» деп әуелі күліп алған аға­мыз, әңгімесін әрі қарай жал­ғастырды. «Ешкімге өкпем жоқ. Мәдениет және ақпарат ми­нистрі Дархан Мыңбай менің өнерімді, еңбегімді бағалап, осы атаққа лайық деп ұсынған еді. Үлкен ризашылығымды білді­ремін, ел-жұртқа разымын» дейді күйші.
Мұндай мәртебелі марапатқа көпшіліктің көзайымына ай­налған «МузАрт» тобының ән­шісі Мейрамбек Бесбаев та ие болды.
Ел алдына бала жасынан бозторғайдай шырылдап шық­қан Мейрамбек жиырма жыл­дан астам уақыт сахнада тер төгіп келеді. Оның аттай он жылы «МузАРТ» ансамблінің арбасын өрге сүйреумен өтке­ні белгілі. Бұдан бөлек, домбы­раның құлағында еркін ой­най­тын әнші продюсер ретінде «Тарту» тобын қолға алып, ая­ғынан тұрғызды. Сондай-ақ тоқсаныншы жылдардың басында белгілі режиссер Қа­нымбек Қасымбеков түсір­ген «Қоштасқым келмейді», был­тырғы жылы продюсер Баян Есентаева түсірген «Ғашық жүрек» фильмдеріне түсіп, ак­терлық қырынан танылды. «Сегіз қырлы, бір сырлы» өнер­пазға бір кездері «Халық артисі» атағын беру туралы ұсыныс та көтерілген еді. Бірақ бұл бас­тамаға берер жыл бұрын «Мә­дениет қайраткері» атағын берумен нүкте қойылған-тын. Енді міне, халықтың тілегі орын­далып, жоғары награ­да­лардың бірімен марапаттал­­ған Мейрамбектің мерейі тағы бір өсіп, абыройы аспандап отыр.
Халықаралық және рес­публикалық байқаулардың лауреаты, бал бармақ күйші Нұркен Әшіров те Мәдениет және ақпарат министрі Дархан Мыңбайдың қолынан «Қа­зақ­стан Республикасының еңбек сіңірген қайраткері» ата­ғын алып, қуанышқа бөленді. Есте­ріңізге сала кетсек, Нұркен - Ел­басы Нұрсұлтан Назарбаев­тың әдебиет пен өнер саласын дамытуға айрықша үлес қосып жүрген жастарға тағайындай­тын Мемлекеттік стипендия иегері. Қазақтың күйшілік мектебін бүге-шігесіне дейін тұтас білетіндігімен ерекше­ленеді. Бүгінгі таңда Жамбыл атындағы Қазақ мемлекеттік филармониясының жеке орындаушысы. Сондай-ақ
А.Жұбанов атындағы респуб­ликалық қазақ орта музыка мектеп-интернатының білікті ұстазы. Мейрамбек Бесбаев жетекшілік ететін «Тарту» то­бының мүшесі. Домбыраны білекпен емес, жүрекпен тар­татын күйші биылғы жылы Жамбыл атындағы мемлекет­тік филармонияда шығармашы-­лық кеш өткізіп, қырғыз қызы Перизат Ибраевамен күй тар­тыс­қан еді. Қомыз бен дом­бырада қатар ойнап, нағыз ше­берліктің үл­гісін көрсетіп, көпшілікті тәнті еткен.
- Жаһандану заманында дүниенің дүрмегіне ілесіп жұ­тылып кетпей, ұлттық құнды­лық­тарымызды жоғалтып ал-­мау мақсатында мемлекет тара­пы­нан көптеген іс-шаралар қол­ға алынды. Тіл, дін мәселесі бол­сын, ән-күйімізге болсын, ай­рықша көңіл бөлініп, билік­тің назарынан тыс қалған емес. Соның ішінде күй өнерін да­мыту үшін «Қазақтың дәстүрлі 1000 күйі» сияқты жобалар қолға алынып, көптеген жоға­ры деңгейлі концерттер, бағдар­ламалар жүзеге асырылды. Бұл игілікті істерді атқаруға жас­тар­ға да мүмкіндік беріліп, кәсіби шеберлігімізді шыңдауға, ізденуге жағдай жасалынды. Қазақтың қара домбырасын асынып, шетелдерде өнер көрсетуге жол ашылды. Мұның барлығы Елбасының кемеңгер саясатының арқасы, Тәуел­сіздіктің жемісі деп білемін. Кішкентай ғана еңбегіміз еле­ніп, үлкен дәрежеге лайық деп танылып жатқаны - мен үшін үлкен мәртебе. Ел ағаларының барлығына шынайы алғысым­ды айтқым келеді. Менің жасым қазір бар болғаны 28-де. Ха­лыққа бергенімнен, берерім көп. Осы жолда бұл атақтың маған үлкен шабыт, серпін берері сөзсіз. Елбасының, ха­лықтың, тыңдарманның сенімін ақтауға тырысамыз. Қара дом­бырам қолдан түскенше ұлттық өнерімізге қызмет етемін деп уәде беремін! - дейді Нұркен Әшіров.
Жас әнші Дилназ Ахмадие­ва, Қазақ Ұлттық өнер универ­си­теті қобыз және орыс халық аспаптар кафедрасының мең­герушісі Әлқуат Қазақбаев, республикалық-халықаралық байқаулардың лауреаты, К.Бай­сейітова атындағы Ұлттық опе­ра және балет театрының со­-лисі Жан Тапин, Астана қала­сы Мемлекеттік филар­мония­сының классикалық және эстрадалық вокал бөлі­мінің жеке орындаушысы, Халық­аралық байқаулардың лауреаты Бибігүл Жанұзақ, Қазақстан Республикасы Ішкі істер ми­нистрлігінің ән-би ан­сам­блінің балетмейстері Эльмира Бақ­қали, К.Байсе­йітова атында­ғы опера және балет театрының балет солисі Рүстем Сейітбе­ков, респуб­ликалық конкурстар­­дың лау­реа­ты Ерболат Мұстафаев
та - ендігі жерде «Қазақстан Рес­публи­касының еңбек сіңірген қайраткерлері». Біз барлық қуаныш иелерін шын жүректен құттықтап, шы­ғар­машылық табыс тілейміз!

 

Бетті дайындаған Қаншайым БАЙДӘУЛЕТ, Айқын