Сон ПАСКАЛЬ: «Қазақ тілін менен де нашар білетін адамдар бар»
Түп тегі британдық болып табылатын Италия әншісі, сазгер әрі саяхатшы Сон Паскальдың Қазақстанда жүргеніне жарты жыл болды. Қазір елімізде бұл жігітті білмейтін жастар аз. Ол өзіміздің танымал актерлардың бірі Әнуар Нұрпейісовпен бірігіп түсірген «Englishman in Shimkent», «Чайка Айгуль» юморлық клиптері арқылы танымал болып шыға келді. Бастапқыдағы әлемдік чарттарда бұл клиптер ең көп қаралған әндердің қатарында болған. Сонның «Абайдың «Көзімнің қарасын» да аздап өз мақамына салып шырқаған романтикалық клипі де көңілден шықты. Қысқасы, ғаламтор арқылы музыка тыңдағанды жақсы көретін жастар арасында бұл әндер әлі де рейтингін жоғалтқан жоқ. (Фото Сон Паскальдың жеке архивінен алынды) 11.09.2012 Қазақстанның үлкен қалаларын аралап жүрген қонақ мұнымен де шектеліп қалмай, жуырда жаңа клиптің тұсауын кесті. «You should speak қазақша» деп аталатын әзіл-қалжыңға толы, көңілді клип қазақ тілін насихаттауға арналған. «Айдаладан келіп», біздің ана тілімізді қолдауға ынта-шынтасымен кірісіп кеткен Сон Паскаль дейтін кім өзі дейтін болсақ, ол өз елінде жап-жақсы танымал әншілердің бірі. Әйгілі «aTunes-2011» музыкалық жобасының финалисі. Ғаламторды кезіп кеткен «You should speak қазақша» клипін түсіруге өзіміздің жергілікті музыканттар, қазақ продюсері Жомарт Сүлейменов көмектескен. Бұл композиция тұсауы кесіле салып-ақ «Авторадионың» музыкалық хит-шеруінде топ бастапты. Көңілділігімен, жеңілдігімен жастарға ұнайды. Сон Паскальдың Қазақстанға келуінің өзі қызық. Концерттердің бірінде оны Дина есімді қазақ қызы Қазақ жеріне қонаққа шақырған екен. Әнші жігітті әуесқойлық жеңіп, бұрын көрмеген елге қыдырып қайтуға бел байлайды. Алайда, аз ғана күнге қыдырыстап келген елде ол ұзақ уақытқа қалып қоямын деп тіпті де ойламаған. Шетелдік әнші бір көргеннен ұнатқан елінде өзінің композиторлық қабілетін мүлде жаңа қырынан сынап көруге болатындығын түйсінсе керек. Шоу-бизнестің таптаурын жолынан тайқып шыға келген италиялық өзін мұнда ұдайы турист ретінде сезінбеу үшін бірден тіл үйренуге ден қояды. Қазақ тілін насихаттауға деген идея да осыдан бастау алғаны белгілі. Айналасына жұғымды, ақжарқын, романтиканы жақсы көретін жігітті біздің музыканттар да бөтенсімей, қатарларына қосып алған. Қазір осындағы достарымен Алматыдағы музыкалық кештерден қалмайтын әншінің әлімсақтан келе жатқан қонақжайлыққа қоятын міні жоқ. Жаңа өміріне дән риза. Қағілез музыкант қазақ тілін меңгеруге күн сайын барын салғанымен қоймай, домбыра тартуды да үйреніп жүр. – Домбыраға бір көргенді қызықтым. Екі шегі ғана болса да бұл аспаппен музыканың бүкіл ғаламатын және орындаушының көңіл-күйін де беруге болады екен, – дейтін әнші қазақстандықтарға да қызыға қарайтындығын айтады. – Мұндағы адамдар бір-біріне бауырмал. Көп ұлт тұрса да тату, бір бірлерінің дәстүрлеріне құрметпен қарайды. Адамдардың жүздері жылы, өте қонақжай. Ал жаңа клип туралы сөз қозғалғанда италиялық әншіні күлкі буып, көңілденіп шыға келді. Би композицияларын жақсы көретін қауым үшін сәтті шыққан клипте Сон Паскаль автобус кондукторының рөлін ойнаса, алматылық рэпер Gallardo таксистің кейпіне еніпті. Ал продюсер Жомарт Сүлейменовке аса көңілді, бір-біріне ұқсамайтын жолаушылары бар 1978 жылы зауыттан шыққан ВАЗ-2101 автобусының жүргізушісінің рөлі бұйырған. Луина есімді жас әнші қосылған ырғақты клип үш тілде шырқалады. – Қазақстанда өте талантты адамдардың неге көп екендігінің сырын ұққан сияқтымын. Қазақ тілінің өзі әуезді естіледі. Қазақша сөйлеп жатқан адамдарға қызығып, осы тілді үйреніп алғым келді. Аздап болса да қазақша түсінісетін дәрежеге жеттім. Тіпті, қазір «Паскальжан. Қазақ тілі сабақтары» деп аталатын блогымды жүргізе бастадым. Алдағы уақытта махаббат жайлы салмақты бір ән жазсам ба деген ниетім бар. Әрине, ол қазақ тілінде болатынын іштеріңіз сезіп тұрған болар?! Келешек туралы бірдеңе деп кесіп айта алмаймын. Еуропаға қашан қайтарым да белгісіз. Дегенмен Ұлыбританияда, бәлкім Италияда болар, қазақтың ұлттық тағамдарын дайындайтын ресторан ашсам деген ой келіп жүр, – дейді ет тағамдарын жақсы көретін Сон Паскаль. Сонның айтуынша, қазақтың болмысы италяндықтарға ұқсайтын көрінеді. – Дүкенге барсам да, таксиде отырсам да қазақша сөйлеуге тырысамын. Сатушылар маған сол сәтте ризашылық танытып, көңілдене қызмет көрсетеді. Мен мұнда қазақ тілін менен де нашар білетін адамдарды кездестіріп, өзінің ана тілін ұлықтауға ұмтылып жүрген осындағы достарымның жаңа идеяларын қуаттауға қуана келістім. Соңғы клиптің өзі де Түрген шатқалы жағындағы Есік көлінде демалып жүргенімізде шықты. Қазақ достарыммен менің шағын гитараммен (укулеле) әндетіп отырдық. Қалжың түрінде басталған ән мақамы мен сөздері жетілдіре-жетілдіре «You should speak қазақша» клипіне айналды. Айтқандай, екі күн бойы көне автобуспен Алматы көшелерін шарлап жүріп түсірген клип Ален Ниязбеков атты жас режиссердің тырнақалды туындысы. – Клип жақсы шыққан секілді. Әрине, мемлекетіміз мемлекеттік тілімізді қолдауға елеулі қаражат жұмсап, бағдарламалар жасағанын білеміз. Бірақ, біз – шоу-бизнес өкілдері осы игі іске өз үлесімізді қоспақпыз. Оның үстіне жастар ақыл айтқанды, құрғақ насихатты ұнатпайды. Ал шоу әлемі оларға ұстаздары мен ата-аналарынан да жақынырақ. Біз осыны музыка тілімен, юмормен жеткізіп, жастарды еліктіре аламыз, – дейді продюсер Жомарт Сүлейменов. Айнаш ЕСАЛИ, «Егемен Қазақстан» газеті http://www.egemen.kz
Түп тегі британдық болып табылатын Италия әншісі, сазгер әрі саяхатшы Сон Паскальдың Қазақстанда жүргеніне жарты жыл болды. Қазір елімізде бұл жігітті білмейтін жастар аз. Ол өзіміздің танымал актерлардың бірі Әнуар Нұрпейісовпен бірігіп түсірген «Englishman in Shimkent», «Чайка Айгуль» юморлық клиптері арқылы танымал болып шыға келді. Бастапқыдағы әлемдік чарттарда бұл клиптер ең көп қаралған әндердің қатарында болған. Сонның «Абайдың «Көзімнің қарасын» да аздап өз мақамына салып шырқаған романтикалық клипі де көңілден шықты. Қысқасы, ғаламтор арқылы музыка тыңдағанды жақсы көретін жастар арасында бұл әндер әлі де рейтингін жоғалтқан жоқ.
(Фото Сон Паскальдың жеке архивінен алынды)
11.09.2012
Қазақстанның үлкен қалаларын аралап жүрген қонақ мұнымен де шектеліп қалмай, жуырда жаңа клиптің тұсауын кесті. «You should speak қазақша» деп аталатын әзіл-қалжыңға толы, көңілді клип қазақ тілін насихаттауға арналған. «Айдаладан келіп», біздің ана тілімізді қолдауға ынта-шынтасымен кірісіп кеткен Сон Паскаль дейтін кім өзі дейтін болсақ, ол өз елінде жап-жақсы танымал әншілердің бірі. Әйгілі «aTunes-2011» музыкалық жобасының финалисі.
Ғаламторды кезіп кеткен «You should speak қазақша» клипін түсіруге өзіміздің жергілікті музыканттар, қазақ продюсері Жомарт Сүлейменов көмектескен. Бұл композиция тұсауы кесіле салып-ақ «Авторадионың» музыкалық хит-шеруінде топ бастапты. Көңілділігімен, жеңілдігімен жастарға ұнайды.
Сон Паскальдың Қазақстанға келуінің өзі қызық. Концерттердің бірінде оны Дина есімді қазақ қызы Қазақ жеріне қонаққа шақырған екен. Әнші жігітті әуесқойлық жеңіп, бұрын көрмеген елге қыдырып қайтуға бел байлайды. Алайда, аз ғана күнге қыдырыстап келген елде ол ұзақ уақытқа қалып қоямын деп тіпті де ойламаған. Шетелдік әнші бір көргеннен ұнатқан елінде өзінің композиторлық қабілетін мүлде жаңа қырынан сынап көруге болатындығын түйсінсе керек. Шоу-бизнестің таптаурын жолынан тайқып шыға келген италиялық өзін мұнда ұдайы турист ретінде сезінбеу үшін бірден тіл үйренуге ден қояды. Қазақ тілін насихаттауға деген идея да осыдан бастау алғаны белгілі. Айналасына жұғымды, ақжарқын, романтиканы жақсы көретін жігітті біздің музыканттар да бөтенсімей, қатарларына қосып алған. Қазір осындағы достарымен Алматыдағы музыкалық кештерден қалмайтын әншінің әлімсақтан келе жатқан қонақжайлыққа қоятын міні жоқ. Жаңа өміріне дән риза. Қағілез музыкант қазақ тілін меңгеруге күн сайын барын салғанымен қоймай, домбыра тартуды да үйреніп жүр.
– Домбыраға бір көргенді қызықтым. Екі шегі ғана болса да бұл аспаппен музыканың бүкіл ғаламатын және орындаушының көңіл-күйін де беруге болады екен, – дейтін әнші қазақстандықтарға да қызыға қарайтындығын айтады. – Мұндағы адамдар бір-біріне бауырмал. Көп ұлт тұрса да тату, бір бірлерінің дәстүрлеріне құрметпен қарайды. Адамдардың жүздері жылы, өте қонақжай.
Ал жаңа клип туралы сөз қозғалғанда италиялық әншіні күлкі буып, көңілденіп шыға келді. Би композицияларын жақсы көретін қауым үшін сәтті шыққан клипте Сон Паскаль автобус кондукторының рөлін ойнаса, алматылық рэпер Gallardo таксистің кейпіне еніпті. Ал продюсер Жомарт Сүлейменовке аса көңілді, бір-біріне ұқсамайтын жолаушылары бар 1978 жылы зауыттан шыққан ВАЗ-2101 автобусының жүргізушісінің рөлі бұйырған. Луина есімді жас әнші қосылған ырғақты клип үш тілде шырқалады.
– Қазақстанда өте талантты адамдардың неге көп екендігінің сырын ұққан сияқтымын. Қазақ тілінің өзі әуезді естіледі. Қазақша сөйлеп жатқан адамдарға қызығып, осы тілді үйреніп алғым келді. Аздап болса да қазақша түсінісетін дәрежеге жеттім. Тіпті, қазір «Паскальжан. Қазақ тілі сабақтары» деп аталатын блогымды жүргізе бастадым. Алдағы уақытта махаббат жайлы салмақты бір ән жазсам ба деген ниетім бар. Әрине, ол қазақ тілінде болатынын іштеріңіз сезіп тұрған болар?! Келешек туралы бірдеңе деп кесіп айта алмаймын. Еуропаға қашан қайтарым да белгісіз. Дегенмен Ұлыбританияда, бәлкім Италияда болар, қазақтың ұлттық тағамдарын дайындайтын ресторан ашсам деген ой келіп жүр, – дейді ет тағамдарын жақсы көретін Сон Паскаль.
Сонның айтуынша, қазақтың болмысы италяндықтарға ұқсайтын көрінеді.
– Дүкенге барсам да, таксиде отырсам да қазақша сөйлеуге тырысамын. Сатушылар маған сол сәтте ризашылық танытып, көңілдене қызмет көрсетеді. Мен мұнда қазақ тілін менен де нашар білетін адамдарды кездестіріп, өзінің ана тілін ұлықтауға ұмтылып жүрген осындағы достарымның жаңа идеяларын қуаттауға қуана келістім. Соңғы клиптің өзі де Түрген шатқалы жағындағы Есік көлінде демалып жүргенімізде шықты. Қазақ достарыммен менің шағын гитараммен (укулеле) әндетіп отырдық. Қалжың түрінде басталған ән мақамы мен сөздері жетілдіре-жетілдіре «You should speak қазақша» клипіне айналды. Айтқандай, екі күн бойы көне автобуспен Алматы көшелерін шарлап жүріп түсірген клип Ален Ниязбеков атты жас режиссердің тырнақалды туындысы.
– Клип жақсы шыққан секілді. Әрине, мемлекетіміз мемлекеттік тілімізді қолдауға елеулі қаражат жұмсап, бағдарламалар жасағанын білеміз. Бірақ, біз – шоу-бизнес өкілдері осы игі іске өз үлесімізді қоспақпыз. Оның үстіне жастар ақыл айтқанды, құрғақ насихатты ұнатпайды. Ал шоу әлемі оларға ұстаздары мен ата-аналарынан да жақынырақ. Біз осыны музыка тілімен, юмормен жеткізіп, жастарды еліктіре аламыз, – дейді продюсер Жомарт Сүлейменов.
Айнаш ЕСАЛИ,
«Егемен Қазақстан» газеті
http://www.egemen.kz
Қысқа да нұсқа. Жазылыңыз telegram - ға