Бұл - депутаттық сауал ретінде көтерілген мәселе. Отбасылық саясатты қолдау мақсатында көтерілген бастама болатын. Қазір әйелге қаншалықты қиын екенін өзіңіз де білесіз. Әйелдер кешке дейін жұмыста жүреді, жұмыс күні сағат 18:00-ге дейін болса, балабақшалар да сол уақытқа дейін жұмыс істейді. Балалардың сабағы бар, жалпы әйелдің мойнында қаншама жұмыс бар. Азаматының денсаулығы, жуатын киімі, үй шаруасы, туысқандарының қарым-қатынасын да ұйымдастыру керек. Ол да әйелдің мойнында. Сондықтан да әйелге, әрине, көмектесу керек. Білімсіз әйелден мәдениетсіз, білімсіз ұрпақ болады, - деді Мәжіліс депутаты Қарақат Әбден.

Оның айтуынша, әйелдер отбасына көбірек көңіл бөлсе, қоғамдағы түрлі мәселенің шешімін табуға болады.

Әйел сол отбасына көңіл бөліп, шаршамай, өзінің әйелдік миссиясын орындау үшін, әрине, жағдай жасау керек. Сондықтан да әйелдердің жұмыс уақытын қысқартқан дұрыс деп есептеймін. Мысалы, ер азаматтарымыз 8 сағаттық жұмыс істейтін болса, әйелдер сол 6 сағат істесе де болады. Әйелдердің жұмыс уақытын 2 сағатқа қысқартатын болсақ, мемлекеттің өзі қай жағынан болса да ұтатын еді. Әйел ертерек келіп, баласына қараса, кешкі асын дайындап берсе, ер азаматының денсаулығына қараса көп нәрседен ұтар едік. Қаншама баланың тәрбиесі, білімі, неше түрлі қылмыстан аман болады. Өкілетті органға осындай ұсыныс берілген еді, - деді Қарақат Әбден.