Аягөзде 26 жастағы офицер өлерінің алдында бастығына ақша аударған

Аягөдегі әскери гарнизонда суицид жасаған офицер Нұрсұлтан Алдамұратовтың анасы Ботакөз Ысқақова ұлымен соңғы рет не туралы сөйлескенін айтып берді, деп хабарлайды El.kz ақпарат агенттігі Azattyq Rýhy-на сілтеме жасап.

Анасының сөзінше, Нұрсұлтан Алдамұратов өлерінің алдында бастағының шотына 213 мың теңге аударған.

Балам маған 15 қыркүйекте 213 мың теңге ақша аударып жіберді. Біраз уақыттан кейін балам қайтадан телефон шалып, «Жаңағы ақшаны қайтадан жіберіңізші, мен бастыққа жіберем деп сізге аударып қойыппын», деді. Сосын мен ақшаны қайтадан балама жібердім. Сол кезде көңіліме күдік ұялады. Балама өзім қайта хабарластым да, «ол ақшаны неге бастығыңа бересің?» дедім. Ол: «Ертең саған «подъемный» түссе, сен көп ақша алдың деп әркім ақша сұрауы мүмкін, сондықтан маған ақшаңды аударып қой деді бастық, - деді Нұрсұлтан», - дейді Ботакөз Ысқақова.

Анасы ұлына «бастығыңа ақшаны берме, ертең қайта сұрап жүресің бе» дегенде, марқұм жігіт «өзім де соны ойлап отырмын» деп жауап берген. Ботакөз Ысқақова Нұрсұлтанның өліміне сол ақша себеп болды ма деп ойлайды.

Осы ақша үшін менің баламды жамандыққа қиды ма деп ойлап отырмын. Бастығының аты - Нұржан Нұрқабаев, - деді ол.

Анасы ұлының өз-өзін өлтірді дегенге сенбейді. Оның айтуынша, ұлы жұмысына адал, жамандыққа бармайтын. Өз өмірін қия салатын бала емес екенін атап өтті.