Елорда тұрғыны ұрланған мемлекеттік нөмірді сатумен айналысқан
Ұрланған нөмір үшін автокөлік иелерінен ақша талап еткен
Астаналық ұрланған мемлекеттік нөмір белгілерін сатқан, деп хабарлайды El.kz Polisia.kz-ке сілтеме жасап.
Автокөліктің мемлекеттік нөмірлерін ұрлауды 30 жастағы ер адам ұйымдастырған. Күдікті мемлекеттік тіркеу нөмірлік белгілерін шешіп алып, орнына “нөмірге қатысты Telegram-ға жаз” деген жазба қалдырған. Ұрланған нөмір үшін автокөлік иелерінен 7-ден 10 мың теңгеге дейін қаржы талап еткен.
Ресей Федерациясының азаматы түнде белгісіз адам Kia Ceed автокөлгінен мемлекеттік нөмірді шешіп алғанын хабарлап, полицияға жүгінді. Аталған көлік Ресейде тіркелген. Қалдырылған жазбада күдікті Telegram арнасының байланыс деректерін көрсетіп, нөмірді қайтару үшін ақша талап еткен.
Түнгі бейнежазбаның кадрларында күдіктінің өз көлігінде автотұраққа кіріп, басқа біреудің көлігінің жанында тоқтап, мемлекеттік нөмірді шешіп алғанын көруге болады. Оған қылмыс жасауға бір жарым минут уақыт кетті.
Жедел-іздестіру іс-шаралары барысында бұрын осыған ұқсас қылмыстар үшін қылмыстық жауапкершілікке тартылған қала тұрғыны ұсталды. Қазіргі уақытта оның үш мемлекеттік тіркеу нөмірлік белгілерінің ұрлығына қатысы бар екендігі дәлелденді. ҚР ҚК 194-бабы (Қорқытып алу) бойынша сотқа дейінгі тергеу амалдары жүргізіліп жатыр.
Қысқа да нұсқа. Жазылыңыз telegram - ға