Астанада жедел жәрдем қызметіне 50-ге жуық көлік берілді
Астана қаласының әкімі Жеңіс Қасымбек жедел жәрдем қызметінің маңызы туралы жазды, деп хабарлайды El.kz ақпарат агенттігі.
Instagram парақшасында жазба жариялаған қала әкімі елордаға қажетті арнайы саланың қаншалықты маңызды екеніне тоқталған.
Жедел жәрдем қызметкерлері тұрғындарымызға алғаш болып медициналық көмек көрсетеді. Олардың жұмысы өте ауыр әрі жауапты. Дегенмен, тұрғындар тарапынан жедел медициналық жәрдем станциясының жұмысына, әсіресе станцияның автопаркіне негізделген шағымдар түседі. Мәселен, жедел жәрдем станциясының автопаркі 146 автокөліктен тұрады. Олардың бір бөлігі жөндеуді қажет етеді. Биыл автокөлік санын арттыру үшін 47 жедел жәрдем машинасы сатып алынды. Олардың 27-сі қазірдің өзінде жеткізілді, тиісінше шақыртуларға шығуға дайын. Қалған бөлігі алдағы аптада жеткізіледі. Көліктердің бәрі шақыртуларға жылдам әрі тиімді көмек көрсететін заманауи жабдықтармен жабдықталған. Сол сияқты жақын арада қолда бар 20 көлік те жөндеуден өтеді, - деп жазды Ж.Қасымбек.
Ол соңғы жылдары жедел жәрдем паркі 90 автокөлікпен жаңартылғанын атап, арнайы техниканы жаңарту жұмысын келесі жылы да жалғастыратынын жеткізді.
Мемлекет басшысы денсаулық сақтау жүйесін дамыту, дәрігерлерге жан-жақты қолдау көрсету мемлекеттің басым міндеттерінің бірі екенін ерекше атап өтті. Біз медицина қызметкерлері мен науқастарға қолайлы жағдай жасау бойынша жұмысты жалғастырамыз. Алдағы жылдары Астанада бірқатар денсаулық сақтау нысанын, оның ішінде перинаталдық орталықтар, емханалар, көпбейінді ауруханалар, олардың бірі – балалар ауруханаларын салуды жоспарлап отырмыз», - деп жазды Астана әкімі.
Қысқа да нұсқа. Жазылыңыз telegram - ға