Астанада кәмелетке толмаған балалар досының үйінен алтын бұйымдарды ұрлаған
Елордада кәмелетке толмағандар ұрлық жасады, деп хабарлайды El.kz ақпараттық агенттігі.
Алматы ауданы ПБ қызметкерлері жедел-іздестіру іс-шараларын жүргізу кезінде бөтеннің мүлкін жасырын ұрлады деген күдікпен екі жасөспірімді анықтады.
Тергеу барысында белгілі болғаны, олар күнделікті сабақтан кейін, сыныптасының үйіне ойын ойнауға барып отырған. Күндізгі уақытта ата-аналары жұмыста болғандықтан, жасөспірімдер үлкендердің қарауынсыз болып, үйде емін-еркін жүрген. Кішкентай қожайынның көзін ала беріп, екі жасөспірім жатын бөлмесінде орналасқан сөренің ішіндегі қорапшадан алтын бұйымдарды ұрлаған. Жымысқы әрекеттерін бірнеше күн бойына қайталаған.
Жалпы саны 8 алтын жүзік пен алқаны қолды қылып, арызданушыға 600 мың теңгенің көлемінде шығын келтірген.
Аталған факті бойынша ҚР ҚК-нің 188-бабымен (Ұрлық) сотқа дейінгі тергеу амалдары басталды. Кәмелетке толмаған балалар заңды өкілдеріне тапсырылып, екеуін де ювеналды полиция қызметкерлері ерекше бақылауға алды.
Қысқа да нұсқа. Жазылыңыз telegram - ға