Астанада «Игроманка» фильмінің түсірілімі аяқталды
Көптен күткен «Игроманка» толық метражды фильмі 2025 жылы көрермен назарына ұсынылады, деп хабарлайды El.kz ақпарат агенттігі.
Әлеуметтік драма басты кейіпкер Жұлдыздың ішкі жан дүниесіндегі күрделі дағдарысты баяндайды. Жұлдыз – орта жастағы қазақ әйелі, оның құмар ойынға тәуелділігі өзін тұтастай жоғалтудың шегіне әкеледі. Мансабын, отбасын, жеке басын тәуекелге тігіп, бәрінен айырылады. Бірақ мәжбүрлі реабилитация кезінде Жұлдыз өз дертін мойындап, өмірге қайта оралу үшін бойында әлі де күш-қуаттың қалғанын аңғарады.
Бұл жоба Қазақстанда кең таралған маңызды мәселені көтереді: бейресми деректерге сүйенсек елімізде 500 мыңнан астам құмар ойынға тәуелді адам бар. Фильмнің продюсерлері осы тақырып бойынша ауқымды зерттеу жүргізді: лудоманияның құрбаны болған адамдардың өмірін талдап, осы тәуелділіктің түрімен күресе білген жандармен кездесу өткізді, кездесу барысында әр адам өз тәжірибесімен бөлісті. Сонымен қатар, құмар ойыншылармен жұмыс істейтін кәсіби психологтардың консультациялары сценарий жазу мен кейіпкерлердің бейнесін жасауда негіз болды.
Сурет: Равиль Сыздықов
Түсірілім екі маусымға жалғасты: қыс пен жаз. Астанаға қосымша, түсірілім жұмыстары Ақмола облысындағы Бурабай ауылы және Ұрымқай елді мекеніндегі табиғат аясында жүргізілді. Бұл табиғи ортаның өзіндік ерекшелігі үлкен эмоционалды драмамен керемет үйлесім тауып, табиғаттың тыныштығы мен басты кейіпкердің ішкі қайғысы арасындағы контрастты айшықтай түсті. Фильмнің түсіріліміне киноиндустрияда көп жылдық тәжірибесі бар 75-тен астам талантты маман қатысты. Режиссері – Алдияр Байракимов, қоюшы-оператор – Азамат Жанабеков.
Кез келген тәуелділік адам болмысын жойып, оның өмірін басқаруға кіріседі. Лудоманиямен ауыратын адам таңдау еркіндігінен айырылады, шынайы құндылықтар бір сәттік ләззатпен алмастырылады. Шын мәнінде, тәуелді адамдар өз еркімен түскен тұзақта жатады, бірақ оны түсінгеннен кейін, олар бұл тұзақтан өздігінен шыға алмайды. Осы сәтте олар көмек сұрауы керек, бірақ көпшілігі дерлік бұған дайын емес. Бұл жерде кінә, ұят, жалғыздық, қорқыныш пен үмітсіздік сезімдері қатты әсер етіп, олар аурумен жалғыз күресемін деп шешім қабылдайды. Бірақ бұл өзін-өзі алдау, ең дұрыс шешім – реабилитациялық орталыққа мамандарға жүгіну, – деді фильмнің бас продюсері Ардақ Қасымбек.
Сурет: Равиль Сыздықов
Фильмнің премьерасы 2025 жылдың көктеміне жоспарланған, көрермендер оны Қазақстан кинотеатрларында тамашалай алады. Фильм мәдениет және ақпарат министрлігінің тапсырысымен, «Ұлттық киноны қолдау мемлекеттік орталығы» КеАҚ қолдауымен түсірілді, бұл өз кезегінде оның әлеуметтік жауапкершілік контекстіндегі маңыздылығын көрсетеді. Сонымен қатар, биыл Президент Қазақстандағы құмар ойындарға қарсы заңға қол қойғанын атап өту керек.
Қысқа да нұсқа. Жазылыңыз telegram - ға