Қарағандыда медиаторлардың сайты іске қосылды, ал 1 қыркүйектен мектептерде медиация қызметі жұмыс істейді
Қарағандыдағы Достық үйінде білім беру мекемелерінің мамандары, судьялар, кәсіби және кәсіби емес медиаторлардың қатысуымен облыстағы мектеп медиациясын дамытуға арналған жиын өтті.
Аталмыш кездесуде мектептегі медиация қызметінен бөлек, отбасылық соттар туралы да мәселелер қарастырылды.
«Мектепте татуластыру жұмысын ілгерілетуде психологтар, әлеуметтанушылар, мұғалімдер мен оқушылардың күштерін біріктіру қажет. Мектептермен орнатылған ынтымақтастық өңірде бірлікті, бейбітшілік пен келісімді дамыту ісінде жақсы нәтиже беретіні сөзсіз»,-деді жиында сөз алған «Диалог» дауларды шешу орталығының басшысы Татьяна Савицкая.
Сонымен қатар Қарағанды облысының кәсіби медиаторлар қауымдастығы қамқоршылық және қорғаншылық органдары жөнінде тегін кеңестер беруде. Онымен қоса, медиация мәселесі бойынша жеке қабылдаулар немесе телефон байланысы арқылы да анықтама ақпараттарын беруде.
Бұған қоса білім беру ұйымдарында шиеленістерді болдырмау, қылмыстың алдын алу, жанжалдарға қатысушыларды әлеуметтік оңалту мақсатында Қарағанды облысының білім беру басқармасы мұғалімдерге арнайы курс өткізді. Бұдан бөлек, ағымдағы жылдың 1 қыркүйегінен бастап облыстың білім беру мекемелерінде медиация қызметі жұмыс істей бастайды.
Шара соңында қатысушыларға Қарағанды облысы Қазақстан халқы Ассамблеясының «E-medіator» веб-сайты таныстырылды. Мұнда медиация және медиаторлардың жұмысы туралы кең ақпарат жинақталған.
Қысқа да нұсқа. Жазылыңыз telegram - ға