Ақмола облысында заманауи дәрігерлік амбулатория ашылды
Ақмола облысының Шортанды ауданына қарасты Новокубанка ауылында жаңа дәрігерлік амбулатория пайдалануға берілді, деп хабарлайды El.kz ақпарат агенттігі.
Бұл нысан «Ауылдық денсаулық сақтауды жаңғырту» ұлттық жобасы аясында салынған және заманауи медициналық жабдықтармен қамтамасыз етілген.
Амбулаторияның қуаттылығы бір ауысымда 50 келушіні қабылдауға мүмкіндік береді. Ол Новокубанка ауылы мен жақын маңдағы елді мекендерде тұратын 2 мыңнан астам тұрғынға сапалы медициналық қызмет көрсетуге арналған.
Ақмола облысының әкімі Марат Ахметжанов жаңа амбулаторияға барып, ондағы жұмыстармен танысты.
Азаматтардың өмір сүру сапасын жақсарту және ауылдық медицинаны дамыту – мемлекет үшін маңызды міндеттердің бірі. Жаңа амбулатория медициналық қызметтерді халыққа жақындатып, ауыл тұрғындарының аудан орталықтарына бару қажеттілігін азайтуға көмектеседі. Бұл – ауылдық инфрақұрылымды дамыту жолындағы маңызды қадам, – деп атап өтті облыс басшысы.
96 жастағы ауыл тұрғыны Мәкер Хабиев жаңа амбулаторияның ашылуына ризашылығын білдіріп: «Ауылдағы қарияларға жақын жерде медицина мекемесінің болғаны өте маңызды. Ел Президентіне қолдауы мен қамқорлығы үшін алғысымды білдіремін. Амбулатория өте жарық, заманауи, жақсы жабдықталған», – деп өз әсерімен бөлісті.
Амбулатория жалпы тәжірибелік дәрігер, терапевт, акушер, физиотерапия мамандары және медбикелердің жұмысын қамтамасыз етеді. Бұл аудандық ауруханаларға түсетін жүктемені азайтып, шалғайдағы медициналық қызмет көрсету сапасын арттырады. Сонымен қатар, амбулатория заманауи диагностикалық және емдеу кабинеттерімен жабдықталған, жедел жәрдем көрсетуге қажетті құралдармен толық қамтамасыз етілген.
Ақмола облысында «Ауылдық денсаулық сақтауды жаңғырту» ұлттық жобасы аясында ауқымды жұмыстар жүргізілуде. 2024 жылы жоспарланған 38 медициналық нысанның 28-і салынды. Бұл бастамалар өңірдің медициналық инфрақұрылымын жақсартып, ең шалғай елді мекендерде уақытылы медициналық көмек көрсетуге жағдай жасап отыр.
Жаңа дәрігерлік амбулатория – ауыл тұрғындары үшін сапалы медициналық қызмет алуға жақындаған маңызды мүмкіндік. Бұл нысан аймақтың әлеуметтік дамуы мен денсаулық сақтау саласындағы үлкен жетістіктердің бірі болып табылады.
Қысқа да нұсқа. Жазылыңыз telegram - ға