Apple компаниясы Safari браузеріне жасанды интеллектімен жұмыс істейтін жаңа іздеу жүйесін енгізуге дайындалып жатыр. Егер бұл жоспар жүзеге асса, онда онлайн іздеу нарығында көп жылдан бері үстемдік етіп келе жатқан Google-дың позициясы едәуір әлсіреуі мүмкін.
Safari-де жасанды интеллектпен жаңа дәуір
Bloomberg таратқан ақпаратқа сәйкес, Apple Safari браузерін түбегейлі жаңартып, іздеу тәжірибесін толықтай жасанды интеллектке негізделген жүйемен алмастырмақ. Бұл қадам дәстүрлі іздеу жүйелерінің орнын ЖИ шешімдерімен алмастыруға жол ашуы мүмкін.
Қазіргі таңда Apple құрылғыларындағы негізгі іздеу жүйесі — Google. Бұл мәртебе үшін Google жыл сайын Apple-ға шамамен 20 миллиард доллар төлейді. Бұл сома Safari арқылы Google-дың іздеу жарнамаларынан түсетін табысының 36%-ын құрайды. Яғни, Apple-дың бұл серіктестіктен бас тартуы Google үшін миллиардтаған доллар табысынан айырылу деген сөз.
Іздеу әдеті өзгеріп келеді
Apple вице-президенті Эдди Кьюдің айтуынша, өткен айда Safari арқылы жүргізілген іздеулер саны алғаш рет азайған. Оның пікірінше, бұл құбылыс — пайдаланушылардың ақпаратты іздеу үшін жасанды интеллект құралдарын жиі пайдалана бастағанының нәтижесі.
Кью сондай-ақ, OpenAI мен Perplexity AI секілді ЖИ шешімдері уақыт өте келе дәстүрлі іздеу жүйелерінің орнын басатынын болжайды. Apple мен Google да бұл үрдісті ескере отырып, болашақта жасанды интеллектпен жұмыс істейтін іздеу құралдарын Safari сияқты браузерлерге енгізуді жоспарлап отыр. Дегенмен, әзірге бұл ЖИ шешімдері Safari-де негізгі іздеу жүйесі ретінде ұсынылмайды.
Бәсеке күшейіп келеді: ЖИ арқылы іздеу жарысы
Apple екінші жағынан Google-дың жаңа Gemini атты жасанды интеллект технологиясын 2025 жылдың маусымында шығатын iPhone 17 құрылғыларына енгізу үшін келіссөздер жүргізіп жатыр.
Сонымен қатар, OpenAI мен Perplexity сияқты ЖИ-ге бағытталған стартаптар да Google-ға үлкен бәсекелестік тудырып отыр. Тіпті, кейбір мәліметтерге сәйкес, ChatGPT Apple-мен арнайы келісім арқылы Siri-ге біріктірілетін нұсқаға айналуы мүмкін.
Сарапшылар пікірі: Google-дың жарнама монополиясына соққы
D.A. Davidson компаниясының талдаушысы Гил Луриа:
«Қазіргі таңда Google іздеу саласының шамамен 90%-ын иемденіп, монополистік үстемдікке жетті. Алайда егер мықты балама платформалар пайда болса, жарнама берушілер өз бюджеттерін Google-дан басқа жүйелерге бағыттайды. Бұл жағдай Google-дың негізгі табыс көзіне – жарнамаға тікелей әсер етеді», – дейді.
Қарапайым қолданушы не ұтады?
Apple-дың бұл шешімі қарапайым пайдаланушылар үшін жаңа мүмкіндікке жол ашады:
- Іздеу сұраныстары нақты әрі контекстік болады
- Жауаптар қысқа емес, толық әрі түсінікті түрде беріледі
- Дыбыстық сұраныс арқылы іздеу күшейе түседі
- Күнделікті қолданылатын Siri немесе Spotlight сияқты жүйелер арқылы бірден нәтиже алуға болады
Қолданушылар енді ақпаратты кілт сөзбен емес, сұрақ қою арқылы алғысы келеді. Мысалы, бұрын "Астанадағы үздік мейрамхана" деп жазсақ, қазір "Астанаға бара жатырмын, кешкі асқа қайда барған дұрыс?" деп сұраймыз – және бұл сұраққа ең нақты әрі контекстік жауапты ЖИ жүйелері бере алады.
Іздеу жүйелерінің жаңа дәуірі басталды
Apple мен Google арасындағы бұл жасырын соғыс — тек екі компанияның бәсекесі емес, бүкіл интернет құрылымының қайта құрылу үдерісі. Жасанды интеллектінің әсерімен адамдар ақпаратты қалай іздейтінін, қайдан алатынын және кімге сенетінін өзгертуде.
Келесі бірнеше жылда біз:
- Жаңа ЖИ іздеу жүйелерінің көбеюін;
- Google-дың бұрынғыдай монополияда болмауын;
- Қолданушылардың іздеуге деген талабын;
- Мобильді құрылғыларда контекстік ЖИ көмекшілердің үстемдігін байқайтын боламыз.
Қысқа да нұсқа. Жазылыңыз telegram - ға
Оқи отырыңыз 
