Apple және Synchron компаниялары ми имплантының көмегімен iPad планшетін ой күшімен басқарған сал ауруына шалдыққан адамның видеосын жариялады, деп хабарлайды El.kz интернет порталы.
Бұл жетістік 2025 жылдың мамыр айында таныстырылған Apple-дің жаңа технологиясының арқасында мүмкін болды. Енді «ми-компьютер» (BCI – brain-computer interface) интерфейстерін Apple құрылғыларына Bluetooth арқылы тікелей қосуға болады. Бұл туралы PC Mag басылымы хабарлады.
Видеода бүйірлік амиотрофиялық склерозбен ауыратын Марк Джексон есімді азамат Synchron Stentrode нейроимпланты арқылы iPad-тағы мәзірмен қол, дауыс немесе көз қимылынсыз әрекеттесіп, қосымшаларды ашып, мәтін тере алады. Джексонның айтуынша, қолын қозғалта алмай қалған соң, өзін толықтай тәуелді сезінген. Алайда бұл технология оған қайтадан туыстарымен байланыс орнатуға, жаңалық оқуға және қоғаммен араласуға мүмкіндік беріп, бұрынғы өмірінің бір бөлігін қайтарды.
Apple компаниясының негізгі жаңалығы – BCI құрылғыларын операциялық жүйе деңгейінде әмбебап қолдауға көшуі. Енді iPad немесе Mac жүйелері ми интерфейстерін кәдімгі пернетақта немесе тінтуір сияқты автоматты түрде таниды. Бұған дейін Apple құрылғыларына мұндай нейроимпланттарды қосу үшін арнайы шешімдер қажет болатын.
Таныстырылымда ерекше назар аударылған тағы бір элемент – ми сигналдарын нақты уақытта көрсететін визуалды индикатор. Экрандағы қосымша белгішесінің айналасындағы көк жиек сигналдың күшеюіне қарай толығып, жүйенің пайдаланушы ниетін қаншалықты дұрыс түсінгенін көрсетеді. Synchron компаниясының операциялық директоры Курт Хаггстромның айтуынша, мұндай кері байланыс өте маңызды – бұл пайдаланушыға зейінін шоғырландырып, жүйемен тиімді өзара әрекеттесуге көмектеседі.
Synchron Stentrode имплантының артықшылығы – оның миға қан тамырлары арқылы енгізілетінінде. Бұл бас сүйегін ашпай-ақ, күрделі нейрохирургиялық отасыз орнатуға мүмкіндік береді. Қазіргі уақытта бұл құрылғы АҚШ пен Аустралияда он науқасқа орнатылған.
Қысқа да нұсқа. Жазылыңыз telegram - ға
Оқи отырыңыз 
