Қант импортына арналған квота қазанға дейін ұзартылды
Ақ қант пен шикі қанттың импортына квота көлемін ұлғайту туралы келісім сөздер жүргізуде.
Бұл туралы премьер-министрдің орынбасары – ҚР сауда және интеграция министрі Бақыт Сұлтановтың қатысуымен Еуразиялық экономикалық комиссия Кеңесінің кезектен тыс отырысында айтылды, – деп хабарлайды El.kz порталы Қазақстан Республикасы Сауда және интеграция министрлігіне сілтеме жасап.
Отырыста Қазақстанның ақ қант пен шикі қанттың бажсыз импортына арналған квотаны 2022 жылғы 31 қазанға дейін ұзарту туралы ұсынысы мақұлданды.
– Бұл шара ішкі нарыққа импортталатын қантты жеткізу құнын төмендетуге мүмкіндік береді. Қазір біз бірқатар елдермен қанттың үлкен көлемін жеткізу туралы келісім сөздер жүргізіп жатырмыз. Ал қарашаға қарай қазақстандық зауыттардан да, ЕАЭО елдерінен де жаңа дақылға қызылша қантын жеткізу басталады, – деп түсіндірді Б.Сұлтанов.
Сонымен қатар, Қазақстан АҚ қант пен шикі қанттың бажсыз импортына квота көлемін ұлғайту туралы келісім сөздер жүргізуде. Қазіргі уақытта Қазақстанның квотасы 2022 жылғы тамызға дейін нөлдік импорттық кеден бажымен 350 мың тонна ақ қант пен шикі құрғақ қантын құрайды.
Қысқа да нұсқа. Жазылыңыз telegram - ға