Шығыс күнтізбесінде Жылқы жылы қозғалыс, серпін және батыл шешімдермен байланыстырылады. Қазақстан тарихына үңілсек, бұл жылдардың ел өміріндегі маңызды бетбұрыстармен тұспа-тұс келгенін байқауға болады. 1966 жылдан бері әрбір Жылқы жылы қоғамдық-саяси немесе экономикалық өзгерістермен ерекшеленді. Ал алда келе жатқан 2026 жыл жаңа циклдің бастауы ретінде мамандардың назарын аударып отыр.

1966 жыл: индустрияландыру және қалалардың өсуі

1966 жылы Қазақстан Кеңес Одағы құрамында болғанымен, бұл кезең республиканың өнеркәсіптік әлеуетінің артуымен есте қалды. Тау-кен, металлургия және энергетика салалары қарқынды дамыды. Қалалар кеңейіп, тұрғын үй құрылысы жанданды. Сарапшылардың айтуынша, дәл осы жылдарда қалыптасқан инфрақұрылым кейінгі экономикалық дамудың негізін қалады.

1978 жыл: Конституция және жүйенің нығаюы

1978 жылы Қазақстан КСР-інің жаңа Конституциясы қабылданды. Құжат республикадағы басқару жүйесін құқықтық тұрғыда бекітіп, жоспарлы экономиканың тұрақты жұмыс істеуіне бағытталды. Әлеуметтік салада салыстырмалы тұрақтылық сақталғанымен, ұлттық тіл мен мәдениетке қатысты шектеулер де қатар жүрді.

1990 жыл: тәуелсіздікке бастар қадам

1990 жыл Қазақстан тарихындағы шешуші кезеңдердің бірі саналады. 25 қазанда Мемлекеттік егемендік туралы декларация қабылданып, елдің болашақ тәуелсіздігіне құқықтық негіз қаланды. Қоғамда ұлттық сана күшейіп, саяси белсенділік артты. Бұл Жылқы жылы Қазақстанды жаңа тарихи бағытқа бастаған кезең ретінде бағаланады.

2002 жыл: экономикалық тұрақтану және жаңа символдар

Тәуелсіз Қазақстан үшін 2002 жыл экономикалық өсіммен ерекшеленді. Ел экономикасы нығайып, Қазақстан халықаралық деңгейде нарықтық мемлекет ретінде таныла бастады. Сол жылы Астанада «Бәйтерек» монументі ашылып, ол жаңа дәуірдің символына айналды. Сонымен қатар 2002 жыл «Денсаулық жылы» болып жарияланып, әлеуметтік саясатқа басымдық берілді.

2014 жыл: сын-қатер және жаңа бағдар

2014 жылы жаһандық экономикалық ахуал Қазақстан экономикасына да әсер етті. Мұнай бағасының төмендеуі жаңа шешімдер қабылдауға мәжбүрледі. Осы кезеңде «Нұрлы жол» мемлекеттік бағдарламасы іске қосылып, инфрақұрылымды дамыту мен ішкі тұрақтылықты сақтауға бағытталған саясат жүргізілді. Бұл Жылқы жылы да қозғалыс пен бағыт өзгерісінің уақыты болды.

2026 жыл: жаңа цикл және жаңа мүмкіндіктер

Алдағы 2026 жыл — Жылқы жылы әрі тоғыз жылдық нумерологиялық циклдің алғашқы кезеңі. Нумеролог Адема Мауленованың айтуынша бұл жыл бастамалар үшін қолайлы саналады.

Нумерологтың болжамына сәйкес, 2026 жыл қаржылық жағдайды жақсарту мен мансаптық өсімге мүмкіндік береді. Осы жылы басталған жобалар ұзақмерзімді перспективада толық жүзеге асуы мүмкін.

Сондай-ақ:

• жаңа жұмыс ұсыныстары мен серіктестік байланыстар пайда болады;
• жеке қарым-қатынастарда нақты шешім қабылдайтын кезең туады;
• отбасында бала дүниеге келу, шаңырақтың кеңеюі жиілейді;
• денсаулыққа қатысты күрделі қауіптер күтілмейді.

Ол 2026 жылды «жаңару жылы» деп сипаттайды. Бұрын аяқталған кезеңдердің орнын жаңа мүмкіндіктер — табыс көздері, тың идеялар, білім алу және әлеуметтік ортаны кеңейту басады.

Қазақстан тарихындағы Жылқы жылдары тоқыраумен емес, керісінше қозғалыс пен шешімдер кезеңімен ерекшеленеді. Ал 2026 жыл бұл үрдісті жаңа деңгейге көтеріп, қоғам мен жеке тұлға үшін жаңа мүмкіндіктерге жол ашуы мүмкін. Ең бастысы — өзгерістен қорықпай, жаңа циклге дайын болу.