Жасанды интеллектінің дамуы жаңа мүмкіндікпен қатар, жаңа сын-тегеуріндер де алып келуі мүмкін. Еңбек және халықты әлеуметтік қорғау вице-министрі Олжас Анафиннің сөзінше, елімізде data scientist, машиналық оқыту инженері, деректер инженері мен талдаушысы, сондай-ақ ЖИ-этика бойынша сарапшылар мен аудиторлар жетіспейді, деп хабарлайды El.kz интернет порталы.

Бұл тапшылықтың басты себептері – арнайы оқу бағдарламаларының жеткіліксіздігі, мықты мамандардың шетелге кетуі және саладағы төмен еңбекақы.

Ал ЖИ-дің қарқынды дамуы кейбір дәстүрлі кәсіптердің жойылуына әкелмек. Алдағы уақытта бухгалтердің бастапқы деңгейдегі қызметтері, конвейер жұмысшылары, ораушылар, станок операторлары мен кассирлердің еңбегіне сұраныс азаяды.

Бүгінде үлкен сауда орындарында кассирдің орнына өзіне-өзі қызмет көрсететін кассалар қойылып жатыр. Бұл – болашақта кеңінен тарайтын үрдіс, – дейді сарапшы Олжас Анафин.